A Xunta reabre parte da ría de Pontevedra 20 anos despois do seu peche

Mar di que conseguiron melloras nas partes internas das rías de Cedeira e Betanzos, así como no polígono de bateas de Vilagarcía A

Por E.P. | SANTIAGO DE COMPOSTELA | 11/08/2017 | Actualizada ás 19:36

Comparte esta noticia

A Consellería do Mar reabrirá ao marisqueo 19 anos despois a parte interna da ría de Pontevedra ao constatar unha mellora na clasificación microbiolóxica das augas da zona. 

Imaxe da papeira de Ence na Ría de Pontevedra
Imaxe da papeira de Ence na Ría de Pontevedra | Fonte: ndignatepontevedra.wordpress.com

A parte comprendida entre Punta Praceres e o peirao de Lourido leva catalogada como zona C --pechada ao marisqueo-- desde 1998 e desde este venres o Instituto Tecnolóxico para o Control do Medio Mariño (Intecmar) decidiu que pase a ser zona B --o produto pode comercializarse tras pasar por unha instalación depuradora--.

A ría de Pontevedra é unha das máis contaminadas de Galicia tanto microbiolóxica coma químicamente (pesticidas e materiais pesados). A causa deste problema, segundo teñen denunciado ecoloxistas e investigadores, ten que ver coas industrias –Ence, principalmente-- e núcleos de poboación existentes na zona, que botan os resíduos á ría. Tamén a actividade marítima derivada do porto de Marín. E iso, a pesar de que esta zona albergaba en 2001 o 10% do total dos viveiros flotantes de Galicia.

A investigadora Rosa Anllo, do Departamento de Química Analítica, Nutrición e Bromatoloxía da USC, publicaba en setembro de 2001 unha tese na que recollía os niveis de compostos de estaño en mostras de auga e sedimentos ao longo de toda a rúa. O seu estudo determinou que a parte interna da ría era a que presentaba as concentracións máis altas de organoestánnicos, especialmente nos arredores do illote de Tambo, e tamén nas inmediacións do porto de Marín.

Marisqueo
Marisqueo | Fonte: Europa Press

Pero, agora a Xunta di que o marisco extraído desta zona é apto para o seu consumo en fresco, "con todas as garantías de calidade e salubridade", segundo informa o Goberno galego, sempre que se someta a proceso de depuración.

As zonas de produción de moluscos bivalvos clasifícanse como A, B ou C. No caso de zona A, os produtos poden acceder directamente ao mercado. En B, é necesario a depuración. E en zona C, só poden ir ao mercado no caso de que vaian para conserva ou tras unha reinstalación para un proceso de depuración natural.

OUTRAS MELLORAS

Ademais, a Xunta informa de que conseguiron melloras na situación microbiolóxica nas partes internas das rías de Cedeira e Betanzos, así como no polígono de bateas de Vilagarcía A.

No caso da ría de Cedeira, trátase da zona entre Punta Sarridal e Punta Xián, que pasa a ser zona B, pois era C entre xuño e setembro.

Respecto da ría de Betanzos, mellora o espazo entre Punta Ostreira e o apeadeiro de Paderne --pasa tamén de zona C a B--. No polígono de Vilagarcía, o cambio é de zona B a A.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta