Incendios: “En vez de conter a hemorraxia, hai que cauterizar a ferida”
A Sociedade Galega de Historia Natural pide un cambio de política na loita contra o lume ante a evidencia de que, goberne quen goberne, pasa o mesmo todos os veráns.
Por Galicia Confidencial | Santiago de Compostela | 25/08/2017 | Actualizada ás 09:00
Galicia enfróntase cada ano a unha batalla que ten perdida antes de comezar. Por iso, cómpre deixar de facer “o mesmo de sempre”, que é conter a hemorraxia no lugar de “cauterizar definitivamente a ferida”.
Este é o punto de vista da Sociedade Galega de Historia Natural, un dos principais colectivos ambientalistas do país, que fai un chamamento a dar un paso atrás e reflexionar sobre porque
“independentemente do volume de vexetación, ou de secas máis ou menos pronunciadas, ou de quen goberne e quen estea na oposición” todos os verán pasa o mesmo.
“A sociedade, a administración e o medio natural galegos son derrotados xa de antemán, aplastados por uns poucos individuos que con gran facilidade, medios rudimentarios e unha enorme impunidade poñen en risco tanto a vida e a seguridade das persoas como os seus bens e facendas, hipotecando o noso futuro como país”, argumentan os ecoloxistas.
