Por Galicia Confidencial | Santiago de Compostela | 10/09/2017 | Actualizada ás 10:00
Cantos anos hai que abristes as portas?
Hai xa 22 anos.
Mudaron moitas cousas no DEZASEIS dende a súa estrea ao día de hoxe?
Claro, é normal cando botas tanto tempo cara o público, tes que adaptarte ó tempo e á demanda da clientela, costumes, modas…
Cales considerades que son as vosas fortalezas? E as debilidades... se as hai?
Pois coma fortaleza pode ser a perseveranza no traballo diario e o mimo aos clientes, aínda que coma debilidade este mimo pode ser tamén… (risas)
A calidade de servizo vai sempre ligada ao bo ambiente do equipo de traballo?
Cremos que se a xente traballa contenta iso reflíctese na atención ó cliente, na elaboración de pratos … sempre se fan as cousas con outro mimo.
Sen ter Estrelas Michelín nin dar titulares á prensa sodes xa unha marca recoñecida e recoñecible. Como credes que se consegue iso?
Perseveranza… o traballo diario, o non deixarse levar, facer as cousas crendo nelas.
Parece que teñades a fórmula da fidelidade, un valor en perigo de extinción na actualidade. Podedes desvelala para o GC?
Fidelidade? Hai de todo pero dentro do barrio (San Pedro) e en Compostela si que temos moitos devotos jejeje. Supoño que polo espazo, o trato amigable, comida da casa, sen alardes, e pouco a pouco vanse fidelizando os turistas tamén, cada vez son máis os que repiten ano a ano pero supoño que será por estas cuestións que comentaba.
Non pensades en medrar e abrir outros "Dezaseis" en Compostela e incluso fóra de Santiago?
Déixao así! Xa hai moito xornal que pagar. (risas)
Ofrecer carta e servizo en galego ocasionouvos algún inconveniente coa xente que vén de fóra de Galicia?
Os inconvenientes son moi puntuais, en todos estes anos puido haber 8-10 persoas que nos pediron a carta en castelán, pero son casos moi puntuais. Ademais os galegos temos algo que parece ás veces non saben... que sabemos falar tamén o castelán. (risas)
Algunha anécdota para estar orgullosos e que vos tocara a fibra nestes máis de 20 anos?
Que nos faga sentir orgullosos, cando volven os clientes. Que fagan o posible para poder comer aquí, iso é algo moi bonito. Déronse casos incluso de cambiar datas de hoteis ou outras reservas se estamos pechados ou completos para poder pasar polo Dezaseis. Iso é tremendo!
Que nos recomendas para comer?
Calquera prato dos que temos na carta está espectacular pero un dos que máis recomendan os nosos clientes é o polbo á grella.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.