Tres avogados da familia do exbatería de 'Los Piratas' tentan demostrar que a súa morte "podería terse evitado"

Ás 9.50 horas deste venres arrincou no Xulgado do penal número dous de Pontevedra o xuízo contra o axente da Garda Civil que en agosto de 2015 disparou e causou a morte a Javier Fernández, que fora batería da banda de rock 'Los Piratas'.

O tres avogados que exercen a acusación particular en representación da viúva, o irmán e os pais do músico piden catro anos de prisión e seis de inhabilitación para o axente, mentres que a Fiscalía e o avogado do Estado sosteñen que este desenfundó a súa arma regulamentaria para defenderse da actitude agresiva da vítima, ante o que foi considerado como un posible caso de violencia de xénero.

Dous axentes do instituto armado acudiran a unha casa de Ponteareas (Pontevedra) para impedir unha suposta agresión doméstica. No transcurso da intervención, un dos axentes disparou a súa arma de fogo regulamentaria e feriu mortalmente no abdome ao músico.

Momentos antes do inicio da vista oral, Manuel Novás, un dos avogados da familia, mostrou o seu convencemento de que van poder acreditar que "a morte se podía evitar". "A un enfermo psiquiátrico, nas condicións nas que se produciu a actuación da Garda Civil, nunca, e digo nunca, poderíase finalizar co falecemento desta persoa", proclamou.

Este letrado tamén cuestionou "onde estaba a situación de risco para poder introducirse, para poder achandar un domicilio?" e lembrou que a muller e o bebé estaban fóra de perigo. Na súa opinión, se a Garda Civil non tiña medios para poder actuar en relación a un enfermo mental, tiña que "pedir axuda". "Teñen que pedir instrucións aos seus superiores ou, loxicamente, mandamento xudicial ao xulgado. Pedírono: non", concluíu.

ESCRITO FISCAL

Con todo, no seu escrito, o fiscal relata que aquel 26 de agosto de 2015, cando os gardas entraron na casa, xa acudira persoal médico e un amigo da familia, Telmo Barciela, que sacara da vivenda ao bebé de oito meses. Engade que o músico "se atopaba moi alterado e descompensado dos seus problemas psiquiátricos e gritou que os mataría a todos".

Segundo a versión dos feitos que detalla a Fiscalía, Javier Fernández abriu un caixón de cubertos, agarrou un coitelo e un tenedor e abalanzouse sobre un dos axentes, "golpes susceptibles de causar a morte", segundo o fiscal. Foi entón cando o garda, "con intención de salvar a vida do seu compañeiro", sacou a súa arma e disparou ás pernas do músico.

O representante do Ministerio Público tamén fai constar que "o axente non era tirador selecto nin recibira formación nin adestramento específico" para o uso da arma a curta distancia en situación de tensión.

PROBAS CONTRA O AXENTE

Neste sentido, esta mañá, Gerardo Gayoso, outro dos avogados que exerce a acusación particular, considerou que as probas contra o axente "son moi contundentes" e afirmou que se puido evitar a morte do músico, coñecido como 'Hal 9000'. "Entendemos que si e é ao que vimos aquí, a que se faga Xustiza e a que haxa unha sentenza nese sentido", expuxo.

Concretamente, Gayoso sinalou, entre as "probas contundentes", á autopsia na que se reflicte que a traxectoria do disparo que causou a morte a Hal é "de arriba abaixo, entrando polo hipocondrio esquerdo e saíndo polo glúteo dereito", por tanto é descendente". "Iso de que se disparou á perna e a bocana da pistola fóiselle cara arriba, bo, sería en todo caso un disparo que a traxectoria indicaría que entraría de abaixo cara arriba, é totalmente diferente", argumentou.

Finalmente, María Sarabia, a terceira avogada da familia, entrou na sala de vistas convencida de poder demostrar que a actuación dos axentes "foi claramente imprudente". "Unha imprudencia ademais grave, porque era un disparo innecesario", dixo e engadiu que "foi innecesaria e desproporcionada".

Por isto, María Sarabia descartou que a acción do garda poida encadrarse nunha actuación "amparada na lexítima defensa, nin coa escusa ou xustificación de cumprimento dun deber". "Non había unha situación de alarma nin de inseguridade ou perigo para a vida das persoas que estaban alí, concretamente, do falecido, e cremos que a súa morte foi completamente innecesaria", concluíu.