Comparte esta noticia

Miles de persoas saíron á rúa este domingo logo das violentas cargas policiais que tiveron lugar durante a mañá do domingo en Cataluña. Unhas cargas que deron a volta ao mundo e que, segundo algúns analistas, provocaron que se teña deteriorado –e moito– a imaxe de España e do seu presidente no exterior. Un conflito, o catalán, que tamén está a afectar á sociedade galega e un bo reflexo diso é a división que existe no país sobre este tema.

Galegos celebran a victoria do SI no referendo de independencia de Cataluña
Galegos celebran a victoria do SI no referendo de independencia de Cataluña | Fonte: Miguel Nuñez

Así, mentres En Marea e o BNG coinciden nos seus argumentos e nas críticas ao Goberno español, o PP defende a actuación do Executivo de Rajoy e o PSdeG evita pronunciarse públicamente. Só algúns dos seus dirixentes, como o rexedor de Vigo, Abel Caballero, rompeu ese silencio para posicionarse en contra dun referendo “ilegal”, pero sen criticar a actuación policial coma fixo Pedro Sánchez. Tamén o voceiro parlamentario, Xaquín Fernández Leiceaga, que criticou a contundente actuación policial contra a cidadanía.

En Marea

O voceiro de En Marea, Luís Villares, considerou ao presidente Mariano Rajoy “inhabilitado” para continuar conducindo a situación en Cataluña e apostou por constituír unha maioría que desprace ao Goberno do PP e C´s. Nunha rolda de prensa este luns, Villares dixo que Galicia non pode estar allea nin desprazada do debate sobre o modelo de Estado e ofreceuse para liderar no conxunto da sociedade galega unha solución que permita establecer un marco de convivencia acorde coa sociedade actual.

O voceiro de En Marea recoñeceu así mesmo o feito de que o referendo non tiña valor xurídico pero explicou que non se trataba dunha cuestión xurídica senón política polo que “so en termos de participación política é onde temos que nos mover”. Por iso, lamentou a incapacidade do Partido Popular e Mariano Rajoy de entender e asumir o momento político que se está a vivir, un momento de cambio e ensanche democrático, que foi na súa opinión o que provocou que se chegara a esta “indesexable situación”. “Entre as porras e as papeletas, nós sempre preferiremos as papeletas” afirmou.

Galegos no  no referendo de independencia de Cataluña
Galegos no no referendo de independencia de Cataluña | Fonte: Miguel Nuñez

Ante todo isto, o voceiro de En Marea considerou que o presidente do Goberno do Estado, Mariano Rajoy, “está inahibilitado para seguir conducindo este rumbo político” polo que apostou por constituír “unha maioría alternativa que desprace ao PP e Ciudadanos e que sexa capaz de dar unha solución pactada e dialogada”. “É o momento de falar da política, do diálogo” afirmou.

Unha opinión moi semellante expresou o goberno municipal de Santiago de Compostela, que pediu a dimisión do presidente do Executivo estatal, Mariano Rajoy, pola súa "incapacidade" para abrir vías de negociación coa Generalitat que permitan solucionar o conflito catalán de forma "pacífica e democrática".

A edil de Economía, María Rozas, e a portavoz do goberno Compostela Aberta, Marta Lois, ofreceron este luns unha roda na que aseguraron que este domingo a cidadanía "volveu ser espectadora dun Goberno español que non ten capacidade política para resolver conflitos" e urxiron a construción dunha maioría alternativa ao PP que negocie co Executivo catalán. "Onte vimos como o presidente Rajoy escondía detrás da Policía e da Garda Civil a súa incapacidade política", manifestou María Rozas, que argumentou que a vía policial "non fai máis que agravar o conflito".

BNG

Tamén a portavoz nacional do BNG, Ana Pontón, destacou o exemplo de "civismo", de "pacifismo" e de "defensa da democracia" mostrado este domingo polo pobo catalán, que contrapuxo con "a outra imaxe" da xornada: a da "represión" do Estado e a violencia "inxustificable e imperdoable" que comparou con "a España do NON-DO".

En rolda de prensa, Pontón sinalou que os diarios de toda Europa "fanse eco das imaxes vergoñosas" rexistradas durante a xornada de referendo sobre a independencia en Cataluña. Unha situación "lamentable" e "impropia dunha democracia" e que evidencia a "escalada autoritaria" protagonizada polo PP e o goberno estatal, que ofrecen "respostas da Idade Media a demandas do século XXI".

Así, criticou o "desnorte" e a "incapacidade de ler" o que está a pasar por parte dos líderes estatais, e considerou que o presidente do Goberno, Mariano Rajoy, "non estivo á altura das circunstancias" e deste "debate profundo" que se estende da implantación do réxime "esgotado" do 78. Por iso, Pontón apelou a que Goberno central abandone esta "vía morta" e respecte ao dereito a decidir.

PPdeG

Unha opinión completamente diferente a do vicepresidente da Xunta, Alfonso Rueda, que apoiou a actuación do Executivo central en Cataluña e asegurou que o sucedido este domingo responde a unha "reacción contundente do goberno lexítimo de España". A preguntas dos xornalistas, tras a firma dun convenio coa Fiscalía Superior de Galicia, cualificou o referendo como "un desafío ao Estado de Dereito". Mentres, considerou que se tratou dunha consulta "sen regras, nin garantías".

"Os resultados están deslegitimados", recalcou Rueda en referencia ás manifestacións do presidente da Generalitat, Carles Puigdemont, sobre os mesmos. Así, afirmou que "a intención" do executivo catalán e de "parte" da sociedade catalá é "romper as regras do Estado de Dereito".

Por iso, considerou que o Goberno central fixo "o que todos" esperaban "que fixesen". "Defender a Constitución e o ordenamento público", engadiu. Preguntado polas cargas policiais, indicou que as imaxes deste domingo reflicten "unha situación difícil". Con todo, dixo que os axentes da Policía Nacional e a Garda Civil actuaron con "firmeza e prudencia". Pola contra, criticou aos Mossos d'Esquadra. Deles, afirmou que "incumpriron desde o primeiro minuto" as resolucións xudiciais.

Tamén o  delegado do Goberno en Galicia, Santiago Villanueva, lamentou o número de feridos rexistrado en Cataluña, tras a celebración do referendo pola independencia, pero asegurou que as Forzas e Seguridade do Estado actuaron para "defender a legalidade".

A preguntas dos xornalistas, coincidindo coa súa presenza no acto de celebración da patroa do Corpo Nacional de Policía, asegurou que o deste domingo foi "un día complicado para toda España", pero apoiou o labor das Forzas e Corpos de Seguridade do Estado.

PSdeG

O portavoz parlamentario do PSdeG, Xoaquín Fernández Leiceaga, evidenciou que o Goberno liderado por Mariano Rajoy "equivocouse" ao actuar "contra a cidadanía" e non "contra quen estaban a promover" o que finalmente foi "un sucedáneo de referendo" en Cataluña.

 

"É unha equivocación maiúscula que crea máis división", lamentou o dirixente socialista, quen pediu non perder de vista que, a pesar de que as posicións independentistas son "minoritarias" en Cataluña segundo os datos da Generalitat, sí reflicten unha vontade "importante" de "buscar un novo marco legal".

Unha opinión diferente á manifestada polo alcalde de Vigo e presidente da Federación Española de Municipios e Provincias (FEMP), Abel Caballero, que proclamou  que agora "é tempo de que a política actúe", tras o "basto simulacro" de referendo deste domingo en Cataluña, e chamou aos políticos a estar "á altura das circunstancias".

Nunha rolda de prensa, Caballero incidiu en que o deste domingo "non foi ningún referendo", senón "un simulacro, sen ningunha garantía, con votos duplicados e triplicados, e sen ningún control". "Un simulacro basto e carente de calquera garantía, foi unha burla á democracia", indicou. "É o momento dos líderes, da calidade na política, e de que os políticos esteamos á altura das circunstancias, porque o de onte foi unha pantomima", sentenciou, á vez que eludiu facer calquera consideración sobre a actuación policial deste domingo.

Bruxelas

Finalmente, a Comisión Europea pedíu este luns “diálogo entre as partes” para solucionar o problema. Nun comunicado, indicou que para o presidente Juncker o referendo catalán é un asunto interno de España, “que hai que abordar de conformidade co ordenamento constitucional de España”.

Con todo, fixo un chamamento a todos os actores pertinentes para que avancen “moi rapidamente da confrontación ao diálogo”. “A violencia nunca pode ser un instrumento en política. Confiamos no liderado do Presidente do Goberno Mariano Rajoy para xestionar este difícil proceso dentro do pleno respecto da Constitución española e dos dereitos fundamentais dos cidadáns nela consagrados”, indico a CE.

Comparecencia de Puigdemont  no referendo de independencia de Cataluña
Comparecencia de Puigdemont no referendo de independencia de Cataluña | Fonte: Miguel Nuñez
Celebración  no referendo de independencia de Cataluña
Celebración no referendo de independencia de Cataluña | Fonte: Miguel Nuñez
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 30 comentarios

18 Watching solpores

Os únicos atrincheirados en algo sodes os que pretendedes atacar un nacionalismo dende outro, ignorando que a nova economía trae consigo novos modelos territorias e comparándovos con estados cuxa orixe é tan distinta coma o francés (nacido dunha Revolución) ou o alemán (froito do desexo dos seus habitantes de crealo). Nós arrastramos un gravísimo problema territorial dende hai séculos que o centralismo só fixo medrar.

17 Watching solpores

Caro Nostrus, de vez en cando convén deixar de lado os prexuízos (e moi san mentalmente) aínda que só sexa polas repercusións no bolso. http://www.20minutos.es/noticia/314... Para que entendas o que está a pasar e comprendas a realidade paralela na que moitos vivides con respecto ao mundo mundial: https://www.youtube.com/watch?v=twK... http://www.lasexta.com/noticias/nac... http://www.elnacional.cat/es/politi... E podemos seguir. Vós non erades os que tan ben falabades inglés? Pois nótase de que debestes de deixar de practicar a lectura nesta lingua. Que pasedes un bo día.

16 Gamela

Pero levamos 7 anos de RETRASO !!! https://twitter.com/Gamela2017/stat...

15 Gamela

Unha petición unánime !!! https://secure.avaaz.org/campaign/e...

14 Undopobo

Isto é a consecuencia dun modelo de Estado que, ademais de ineficiente, leva no seu propio cerne a división e o enfrontamento entre españois. O Estado Autonómico, aínda que pretendía igualar en dereitos a todos os españois, o que fixo foi preservar os privilexios e as diferenzas entre eles. Os nazionalismos non se cansan de facer fincapé nas "diferenzas", potenciar o que nos fai "distintos", crear unha especie de mantra identitario arredor da orixe medieval das línguas e do carácter dos pobos (coma se todos os cidadáns do pasado e do presente tivesen os mesmos pensamentos, emocións ou pulsións de identidade), de alonxar a uns dos outros de maneira que ir de Galicia a Asturias (dúas realidades tan próximas) comecen a percibírense coma un cambio de país. Niso derivou e o fará aínda máis esta concepción falsa da nosa realidade como españois: pobos distintos e illados aos que sólo os Reis Católicos, Os borbóns e Franco someteron coa guerra entre eles.

1 nostrus

Ese é o conto do "feito diferencial" ao que tanto apelan os nacistas e que poderia ter algunha diferencia da Idade Media, pero dende logo inexistente no dia de hoxe. De feito Barcelona parécese mais a Madrid que a calquera aldea de Cataluña e unha comarca de Ourense parécese mais ao Bierzo que a un pobo da costa da Coruña. Tes razon en que a xente de hoxe non pensa igual ca da Idade Media, agás os nacionalistas que viven illados e anclados no pasado e sempre seguiran nel porque non evolucionan. Un pobo que se atrinchera detras da sua cultura esta condenado a extincion porque no intercambio cultural é onde se aprende e se progresa. Nacionalismos NOOOOONNNN