10 días de lume en Cervantes arrasan parte dos Ancares e carballos de 500 anos
A Xunta non facilitou aínda a superficie queimada do último lume da gran vaga de incendios que afectou ao país. Grandes extensións de alto valor ecolóxico quedaron calcinadas.
Por Galicia Confidencial | Cervantes | 25/10/2017 | Actualizada ás 09:00
Este martes á tardiña, e logo de intensos días de intertidume e temor, os efectivos de loita contra o lume lograron sufocar o incendio forestal que afectaba o municipio de Cervantes (Lugo), o último que quedaba por extinguir da gran vaga de incendios que afectou a Galicia nas últimas semanas. Un lume que levaba ardendo máis de 10 días.
Este incendio forestal afectaba á parroquia de Noceda, no municipio lucense de Cervantes, segundo informou a Consellería do Medio Rural que, con todo, non informou, polo momento da superficie calcinada polo lume, declarado o pasado venres 13 de outubro pola noite.
Neste concello foron tres os grandes lumes que se rexistraron; o de Donís, Noceda e Cereixido, que arrasaron na súa maior parte terreos da Rede Natura. Ademais ardeu unha casa na poboación de Freixedo, na parroquia de Cereixido, ademais de palleiros, alpendres e algún vehículo, entre outros danos.
Foron enormes, ademais, segundo o propio concello e grupos ecoloxistas os danos en paraxes de gran valor ecolóxico na zona dos Ancares. De feito, arderon carballos e castiñeiros centenarios, algúns de máis de 500 anos de antigüedade.
