Por Galicia Confidencial | Viveiro | 31/10/2017 | Actualizada ás 12:00
Máis de duascentas persoas participaron este luns na asemblea informativa na defensa da Área Sanitaria da Mariña nun encontro organizado por Somos unha Área Viveiro e na que participaron múltiples asociacións e colectivos, veciñanza a título persoal e cargos públicos. Na xuntanza púxose de manifesto os graves problemas da sanidade pública en Galicia e, especialmente, os que afectan a esta comarca.
No acto participaron tamén o Presidente da Xunta de Persoal do Hospital da Costa, a coordinadora da Plataforma na Defensa da Sanidade Pública da Mariña e o ex-xerente do Hospital da Costa Pablo Mosquera.
Os veciños apostaron pola defensa dun ben común, a sanidade pública, e rexeitaron a supresión da área sanitaria, segundo informaron os convocantes nun comunicado. Tamén manifestaron que queren as mesmas condicións para a comarca da Mariña que as que ten a comarca de Ferrol e que a sanidade desta zona do norte de Lugo precisa dunha ampliación de servizos. “Que non nos leven o que temos para Lugo”, indicaron ao tempo que rexeitaron ser cidadáns de segunda. “Merecemonos unha sanidade digna, de proximidade e de calidade”, suliñou o colectivo veciñal.
Durante o acto puxeron riba da mesa distintas medidas para iniciar un calendario de actos ao longo de todo o mes de novembro en Viveiro na defensa da sanidade pública que foi aprobado pola maioría da veciñanza. O primeiro terá lugar este domingo 5 de novembro durante un acto do C. D. Esgovarros Viveiro na cidade do Landro, confirman dende Somos unha Área Viveiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.