A plataforma de bombeiros públicos de Galicia reclama recuperar a xestión directa dos parques privatizados
Demandan, ademais, a aprobación dun regulamento do bombeiro profesional.
Por E.P. | SANTIAGO DE COMPOSTELA | 01/11/2017 | Actualizada ás 20:11
A plataforma de bombeiros públicos de Galicia reclama a recuperación da xestión directa de todos os parques "privatizados", no marco da modificación do mapa de emerxencias do país.
Demanda, ademais, a aprobación dun regulamento do bombeiro profesional, e unha análise "pormenorizada" de todos aqueles condicionantes "que contribúan á mellora da calidade" dos parques.
No actual contexto, a plataforma estima que o "primeiro paso necesario para pór orde en todo este desastre pasa por lexislar". "Unha vez máis, parece que se insiste en empezar a casa polo tellado", advirte.
Neste sentido, apuntan a que a Deputación de Pontevedra "non manifestou de maneira concisa que modelo de xestión pretende implantar". Subliña, nesta liña, que "todas as modificacións que leven a cabo deben ir enfocadas cara á recuperación da xestión directa".
