A Xunta impulsa a creación dunha academia para fomentar o espírito xacobeo
O seu obxectivo é fomentar e coordinar o estudo e divulgación do fenómeno Xacobeo en todas as súas vertentes. A Xunta non informou do custo nin do persoal que destinará a este novo "chiringuito".
Por Galicia Confidencial | Compostela | 27/11/2017 | Actualizada ás 11:10
O Consello da Xunta deu xa luz verde á creación da Academia Xacobea. O novo órgano --ou "chiringuito" en palabras dalgúns deputados-- comezou a súa xestación a finais do ano 2015 coa finalidade de fomentar e coordinar o estudo e divulgación do fenómeno xacobeo en todas as súa vertentes.
Por iso, nos seus fins establécese que promoverá a investigación do Camiño de Santiago, así como tamén difundirá os valores universais que lle son propios, sempre actuando dentro dos principios de lealdade e colaboración con outros órganos con competencias na materia.
Así, entre outras actividades, encargarase de organizar reunións, simposios, foros e xornadas; promover publicacións; crear premios, bolsas e distincións; establecer relacións de reciprocidade con entidades con fins análogos; subscribir convenios ou acordos de colaboración co entidades do ámbito universitario ou investigador; e promover o mecenado do sector privado para a realización de actividades da Academia.
O organismo -que terá como ámbito de actuación a comunidade galega, con domicilio en Santiago de Compostela- estará integrada por un máximo de trinta académicos de número e académicos correspondentes; así como dos académicos de honra que se designen. A Academia quedará adscrita á Consellería de Cultura, Educación e Ordenación Universitaria e está suxeita ao principio de transparencia na súa xestión, e por iso, elevará anualmente unha memoria coa información relativa á xestión económica, ou acordos subscritos.
A Xunta non informou do custo que terá este nóvo órgano, nin os funcionarios que traballarán nel, nin o diñeiro que terán a súa disposición os académicos que formen parte do mesmo.
