Por Galicia Confidencial | Compostela | 26/11/2017 | Actualizada ás 11:30
Os grupos ecoloxistas Adega, Amigos da Terra, Verdegaia, Sociedade Galega de Historia Natural, ademais da Plataforma pola recuperación do río Sar, emitiron un posicionamento conxunto sobre o emprazamento da Estación Depuradora de Augas Residuais (EDAR) de Santiago no que rexeitan por completo a localización actual, no Souto, e decántanse por situar as novas instalacións no mesmo lugar que ocupa a infraestrutura actualmente, na Silvouta.
As cinco entidades ecoloxistas coinciden na absoluta necesidade de que Santiago conte cunha EDAR nova que permita eliminar as verteduras contaminantes ao Sar, pero advirten que a nova depuradora debe de ter unha mínima afección tanto á vexetación, a flora e a fauna como á paisaxe e ao patrimonio natural.
Por iso consideran que, ante a dicotomía entre A Silvouta ou O Souto, a primeira é unha mellor opción, xa que a segunda conta con interesantes formacións boscosas que se porían en perigo. Ademais, as obras terían maior impacto ambiental e xerarían máis gases de efecto invernadoiro, sosteñen.
Afectación de bosques autóctonos
De feito, no Souto existe un dos poucos bosques autóctonos galegos da comarca de Santiago, ademais de elementos patrimoniais, como petróglifos e mesmo unha ponte medieval, a de Pontecarbita, que sufriría o impacto das obras.
As entidades conservacionistas alertan de que o río Sar leva décadas soportando unha depuración "absolutamente deficiente" porque a EDAR de Santiago está "obsoleta". Unha situación que, advirten, mingua o potencial ecolóxico dunha canle fluvial que, por non contar con aproveitamentos hidroeléctricos de relevancia, podería acoller unha importante fauna piscícola da que actualmente carece.
O posicionamento conxunto das cinco entidades naturalistas coincide coa recente admisión a trámite por parte do Tribunal Superior de Xustiza de Galicia dun recurso contra a construción da depuradora en O Souto. Precisamente, a Plataforma do Sar convocou xa aos veciños de Bertamiráns (Ames) a un acto no Pazo dá Peregrina para explicarlles as consecuencias desta decisión.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.