A nova lei de saúde "blindará" os hospitais comarcais e facilitará concursar cando haxa vacantes

O Goberno autonómico aprobou este xoves para a súa remisión ao Parlamento a reforma que "actualiza" a lei galega de saúde de 2008 e que introduce novidades como a "blindaxe legal" dos 14 hospitais que hai na comunidade, incluídos os comarcais. Tamén se habilita o concurso aberto permanente en resposta a unha petición reiterada dos profesionais sanitarios.

Así o explicaron o presidente galego, Alberto Núñez Feijóo, e o conselleiro de Sanidade, Jesús Vázquez Almuiña, na rolda de prensa posterior ao Consello da Xunta, que deu luz verde a esta norma que mantén a reorganización prevista para a xestión sanitaria de sete áreas --a estrutura xa pivotaba sobre sete áreas de xestión integrada-- e crea 14 distritos.

O conselleiro defendeu esta reorganización e tanto el como Feijóo subliñaron que "por primeira vez" en Galicia quedarán "blindados por lei os hospitais comarcais". "Ningún goberno poderá tocalos salvo que haxa unha autorización do Parlamento", proclamou o presidente, quen destacou que a norma facilita "a participación" en todos os ámbitos.

En canto ao concurso aberto permanente, o presidente avanzou que a nova lei permitirá aos profesionais concursar cada vez que haxa unha vacante, o que facilitará "a conciliación". Até agora as prazas acumulábanse e, segundo concretou Almuiña, "para non ter á xente examinándose continuamente", había concursos "cada dous ou tres anos".

O obxectivo agora é, unha vez que se perfile o sistema, que as vacantes poidan cubrirse cun profesional de forma estable "no menor tempo posible". "A idea é que o podamos facer unhas tres veces ao ano", explicou Almuiña.

(HABERÁ AMPLIACIÓN)