O mozo condenado por agredir a Rajoy, en liberdade o vindeiro venres
O mozo pontevedrés, que tiña 17 anos no momento da agresión, recobrará a súa liberdade ao cumplirse dous anos do suceso, segundo adiantou pontevedraviva.com, malia que seguirá un ano máis en liberdade vixiada.
Por Galicia Confidencial | Pontevedra | 08/12/2017 | Actualizada ás 14:21
O mozo pontevedrés condenado por agredir a Mariano Rajoy durante un paseo electoral por Pontevedra quedará libre o vindeiro venres, 15 de decembro, segundo adiantou en exclusiva pontevedraviva.com. Andrés V. F., alcumado Capi, recobrará a liberdade ao cumplirse os dous anos do seu internamento.
O mozo pontevedrés agrediu ao presidente do Goberno o 16 de decembro de 2015 e, tras pasar a noite nos calabozos, foi posto a disposición xudicial e o Xulgado de Garda decretou o seu internamento preventivo nun centro de menores de Ourense. Seis meses despois, en maio do 2016, o Xulgado de Menores de Pontevedra condenouno a dous anos de internamento en réxime pechado como autor dun delito agravado de atentado contra a autoridade, como é un membro do Goberno.
A condena foi resultado dun acordo de conformidade entre o mozo e a Fiscalía de Menores de Pontevedra, tras recoñecer os feitos e mostrar o seu arrepentimento. Durante todo este tempo e ata agora, permaneceu internado.
Fontes xudiciais confirmaron a pontevedraviva.com que o mozo agresor recobrará a súa liberdade pero seguirá durante un ano máis en situación de liberdade vixiada. Na súa condena tamén ía incluído someterse a un programa de reeducación que, no caso de que se comprobe que non deu os seus froitos, implicará que volva perder a liberdade.
O rapaz tiña 17 anos cando agrediu ao presidente do Goberno na pontevedresa praza da Peregrina, pero cumpriu os 18 en marzo do 2016. Malia ter a maioría de idade, seguiu internado nun centro de menores de réxime pechado ata agora, pois o delito polo que foi condenado impúxoselle cando era menor.
O líder do PP, Mariano Rajoy, non chegou a exercer ningunha acción contra o menor, de modo que non tivo que pagarlle ningunha indemnización nin foi condenado tampouco a pagar responsabilidade civil. Ademais, nestes últimos dous anos transcendeu que a familia e o propio menor pediron desculpas a Rajoy, que no momento da agresión era presidente en funcións.
Información facilitada por pontevedraviva.com
