A compravenda de vivendas aumenta un 26% por cento en outubro en Galicia

A compravenda de vivendas incrementouse nun 26% en Galicia o pasado mes de outubro en relación ao mesmo mes de 2016 e situouse lixeiramente por encima do que o fixo a media estatal (25,7%), segundo os datos difundidos este mércores polo Instituto Nacional de Estatística (INE).

En total o número de operacións de compravenda de vivendas rexistradas en outubro é de 1.292. Por cada 100.000 habitantes, en todo o país rexistráronse 101 compravendas, mentres que en Galicia o dato é de 59.

Na comunidade, das 1.292 operacións de compravenda anotadas en outubro, a maioría realizáronse sobre vivenda libre (1.245) fronte a 47 casas protexidas.

Atendendo á antigüidade dos inmobles, mentres 275 operacións corresponderon a vivenda nova, un total de 1.017 estiveron relacionadas con edificios usados.

Incluídas as 1.292 compravendas, no décimo mes do ano realizáronse un total de 2.847 operacións sobre vivendas. Á marxe, houbo 30 doazóns, sete permutas, 730 operacións de herdanza e 788 doutro tipo.

OUTRAS TRANSMISIÓNS

En outubro, ademais, transmitíronse en Galicia 5.255 predios urbanos. As operacións foron de compravenda en 2.434 casos, e houbo tamén 48 doazóns, 15 permutas, 1.178 herdanzas e 1.580 casos doutro tipo. Igualmente traspasáronse en Galicia 2.019 predios rústicos en outubro --664 compravendas, 19 doazóns, 40 permutas, 756 herdanzas e 540 doutro tipo--.

Así, Galicia rexistrou un total de 7.274 transmisións de predios, entre rústicas e urbanas, o que supón un incremento interanual con respecto a outubro do ano anterior da 20,9% fronte ao 12,3% estatal. Por cada 100.000 habitantes, no conxunto do Estado compútanse 390 operacións de transmisión de predio e en Galicia, 120.

DATOS ESTATAIS

No conxunto estatal, a compravenda de vivendas subiu un 25,7% o pasado mes de outubro en relación ao mesmo mes de 2016, até sumar 37.228 operacións. O avance interanual de outubro, co que a compravenda de vivendas encadea seis meses consecutivos de alzas, foi case 15 puntos superior ao de setembro (+11%).

As transaccións sobre vivendas usadas aumentaron un 24,8% en outubro en relación ao mesmo mes de 2016, até totalizar 30.285, mentres que a compravenda de vivendas novas avanzou un 29,8% en taxa interanual, até 6.943 transaccións.

O 90,6% das vivendas transmitidas por compravenda no décimo mes do ano foron vivendas libres e o 9,4%, protexidas. A compravenda de vivendas libres incrementouse un 26,5% en outubro en taxa interanual, até sumar 33.727 transaccións, en tanto que as operacións sobre vivendas protexidas avanzaron un 19,1%, con 3.501 transaccións.

En termos mensuais (outubro sobre setembro), a compravenda de vivendas baixou un 3,6%, o seu menor descenso neste mes desde 2014.

CATALUÑA REXISTRA O MENOR CRECEMENTO INTERANUAL

O pasado mes de outubro o maior número de compravendas de vivendas por cada 100.000 habitantes deuse en Baleares (135), Comunidade Valenciana (130) e Madrid (122). No mes do referendo independentista, en Cataluña vendéronse 99 vivendas por cada 100.000 habitantes.

Andalucía foi a rexión que máis operacións sobre vivendas realizou no décimo mes do ano, con 7.287 compravendas, seguida de Madrid (6.201) e Cataluña (5.743).

Todas as comunidades incrementaron o número de compravendas de vivendas en outubro en taxa interanual. O menor repunte correspondeu a Cataluña, cun avance do 12,4%, e o maior a Madrid, cun aumento do 50%.