O prezo medio do solo urbano sobe en Galicia un 5,9% no terceiro trimestre de 2017

O prezo medio do solo urbano subiu nun Galicia un 5,9 por cento no terceiro trimestre de 2017 até situarse nos 90,2 euros por metro cadrado, segundo os datos publicados este venres polo Ministerio de Fomento.

Respecto ao mesmo período do pasado ano, o prezo medio do solo das urbes galegas aumentou un 21,3 por cento na variación interanual.

A subida dos prezos no terceiro trimestre é responsabilidade dos datos rexistrados na provincia da Coruña, onde o valor do solo creceu un 64,6 por cento.

Por contra, os prezos caeron no resto das provincias galegas, con descensos do 20,1% en Lugo, o 32,1% en Ourense e o 13,9% en Pontevedra.

En canto á comparativa interanual, A Coruña aumentou o valor do seu solo urbano nun 55,2%, Lugo un 9,9% e Pontevedra un 13,6. Por contra, en Ourense os prezos caeron un 26%.

Así as cousas, Galicia rexistrou no terceiro trimestre do ano 91 transaccións de solo urbano. A superficie transmitida foi de 82.000 metros cadrados cun valor de 5,8 millóns de euros.

En canto aos datos estatais, o prezo medio do metro cadrado do solo urbano creceu no terceiro trimestre do ano un 7,8% en taxa interanual, até os 162 euros, mentres que respecto ao trimestre anterior experimentou un descenso do 2,6%, segundo a Estatística de Prezos de Solo do Ministerio de Fomento.