Por E.P. | SANTIAGO DE COMPOSTELA | 20/12/2017 | Actualizada ás 13:24
O alcalde de Santiago, Martiño Noriega, asegurou este mércores que o espazo creado ao redor da candidatura Compostela Aberta —coa que foi elixido rexedor— está "consolidada" e afirmou que a súa decisión sobre se se volve presentar en 2019 tomaraa no verán do ano que vén.
A preguntas dos medios após un almorzo informativo con todos os concelleiros do grupo de goberno, no que tamén falou dos obxectivos para o próximo 2018, Noriega admitiu que "a nivel persoal" xa trasladou ao seu grupo que fará a "reflexión" sobre o seu futuro o próximo verán, pero precisou que non está "en coordenadas preelectorais" aínda.
O rexedor compostelán afirmou que "primeiro está a cidade" e as "eleccións son secundarias", pero reivindicou que o espazo de Compostela Aberta está "consolidado" e "chegou para quedar".
"Nós somos de non coller moita carrerilla para non chegar cansos", chanceou, inicialmente, Martiño Noriega, quen incidiu en que non se situou neste momento no plano electoral, porque todo o equipo está "subsumido" na acción de goberno.
"A nivel persoal farei a miña valoración ao longo do verán que vén e entendemos que agora estamos nun momento moi importante para executar moitas cousas. E entendemos que agora o importante é a cidade e as eleccións son secundarias; xa haberá tempo de falar delas, tanto das dispoñibilidades persoais como do propio espazo", manifestou o alcalde, quen en todo caso subliñou que "dá a sensación de que o espazo Compostela Aberta chegou para quedar".
OBXECTIVOS 2018
O rexedor compostelán manifestou que as expectativas para o próximo ano "son moi boas", porque están "lanzados moitos proxectos importantes da cidade". Así, asegurou que 2018 vai ser "un ano importante en canto a obra pública para a cidade".
Noriega augurou que se vai "recoller" o sementado en anos anteriores e, nese sentido, as expectativas "son positivas". "O social, o cultural e a posta verde de Compostela", obxectivos concretos para "pechar o relato" que se iniciou hai dous anos e medio cando Compostela Aberta chegou ao Pazo de Raxoi.
QUE SE CUMPRAN OS COMPROMISOS
Doutra banda, o alcalde de Santiago espera que o próximo ano se cumpran " os compromisos" coa cidade, como son a rotonda de Conxo e a intermodal, peticións que lanzou directamente ao ministro de Fomento, Íñigo de la Serna, quen precisamente está este mércores na capital galega.
A expectativa é que a primeira fase —pasarela, estación de autobuses— estea lista antes do Ano Santo. "Confórmome", dixo, con que se cumpran cos compromisos adquiridos e que están "consolidadas", aínda que hai "máis necesidades".
O alcalde compostelán, quen se queixou ante o Ministerio de Fomento porque inicialmente se programou o acto para este mércores sen contar co Concello da capital galega, indicou que seguirán falando con altos cargos e co Ministerio, aínda que dubidou de que o formato do acto desta xornada deixase oco a un encontro co titular do departamento para abordar os "compromisos" coa cidade.
"Mantense un clima de colaboración moi positivo, especialmente con Adif", dixo Martiño Noriega, quen este mesmo martes falou co presidente do administrador de infraestruturas, segundo indicou.
Sobre os orzamentos, séguese mantendo o obxectivo de, "unha semana arriba, unha semana abaixo", e co límite da primeira quincena de xaneiro, contar cos orzamentos municipais aprobados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.