Adif licita a redacción de proxectos de supresión de 36 pasos a nivel na liña Ourense-Monforte-Lugo

Adif licitou, por importe de case 2,85 millóns, a redacción dos proxectos de supresión de 36 pasos a nivel na liña de ancho convencional Ourense-Monforte-Lugo.

O traballo a desenvolver parte da necesidade de suprimir os pasos a nivel existentes neste traxecto, de forma que sexa posible unha "mellora substancial" dos parámetros tanto de seguridade como de confort e tempos de viaxe, explica Adif nun comunicado.

As actuacións a realizar están asociadas, apunta, ás condicións e futuros parámetros de explotación que se expoñen para o traxecto Ourense-Monforte de Lemos-Lugo, establecidos polos estudos desenvolvidos para a implantación da nova rede ferroviaria de Galicia, e terán en conta tanto a actual xeometría do trazado da liña como a existencia de determinados elementos situados no traxecto indicado.

Neste contexto, Adif indica que é preciso dispor dos proxectos construtivos que integren toda a información necesaria para levar a cabo as obras de supresión de cada un dos 36 pasos a nivel situados en diferentes puntos do traxecto Ourense-Monforte-Lugo.

Deste xeito, reivindica que "se cumpre o compromiso do Ministerio de Fomento de executar actuacións de mellora do trazado existente entre Ourense e Lugo".