Por Walter Burns | Santiago | 02/01/2011 | Actualizada ás 12:39
GC ofrece a segunda parte da entrevista con Montse Neira, despois de que a primeira parte sumara 1.500 visitas no Youtube nunha semana. Neira é investigadora do fenómeno da prostitución; coa vantaxe que lle dá levar varias décadas exercendo de prostituta en Barcelona. En decembro a UNED incorporouna como relatora a un curso en Lugo.
No debate sobre a prostitución hai dous polos. Os que defenden a legalización como noutros estados (Holanda, Dinamarca, Nova Zelandia, etc.) e os que defenden a súa abolición, por entender que calquera forma de prostitución é degradante para a muller, postura habitual entre algunhas asociacións feministas.
Críticas ás feministas abolicionistas
"Por parte desta corrente feminista del feminismo cultural no interesa [o debate sobre a legalización] porque elas defenden a posición de que o home é o maltratador, o malo malísimo e as mulleres somos unhas pobres vítimas sometidas ao patriarcado", argumenta Neira en referencia ás abolicionistas.
Licenciada pola UAB e colaboradora de medios como La Vanguardia, Neira participou en varios foros organizados por feministas. A súa conclusión é que "con elas non se poden debater" porque "recorren a descualificacións". Foi precisamente a necesidade de dar a coñecer as súas ideas á marxe da tensión destes debates o que provocou o nacemento do seu blog.
A todos os que piden a abolición, Neira reclámalles que "fagan un esforzo por coñecer a realidade" e que "se esforcen en escoitarnos".
Por que se prostitúen algunhas persoas?
Natural do Courel, unha das comarcas máis pobres de Galicia, Neira tivo que emigrar a Barcelona. Malia defender a prostitución como calquera outro oficio, Neira admite abertamente que son as eivas económicas as que empuxan ás mulleres, e tamén a uns poucos homes, a se prostituír.
"Se non nos deron outras oportunidades, e temos a posibilidade de nos prostituír e facer moito diñeiro, pois facémolo. Se eu nacera noutro contexto, posiblemente non me houbera prostituído e posiblemente hoxe sería abolicionista", recoñece ás cámaras de Tingalaranga.
Emigración económica ou trata?
As redes de trata teñen menos peso na prostitución que o transmitido nos medios. Este é un dos argumentos máis polémicos que defende esta experta. Apelando a súa experiencia en 62 locais, Neira di que "a xente emigra porque quere progresar, e se non o pode facer nas canles legais, vai tirar das canles ilegais, e pagar o que sexa; e iso non é trata, é tráfico, vailles custar máis cartos que polas vías legais, pero arríscase, porque a xente quere progresar".
Sexo de pago para discapacitados
Na entrevista en Santiago, Neira tamén aborda a súa labor como prostituta para persoas discapacitadas. En concreto, critica a represión sobre a súa sexualidade e apunta que hai estados como Suíza e Dinamarca que "regularon que as persoas con dependencia total e absoluta, é convínte que vaian con algunha profesional, algunha asistente sexual de discapacitados".
"O sexo é unha cousa e o amor outro, non ten que estar dogmatizado nin ideolixizado, o sexo é natural, é inherente a persoa humana, senón non sentiriamos pracer. Todo o noso corpo é potencialmente susceptíbel de sentir pracer, ten que servir para algo, polo tanto, reprimilo, non" , conlúe Neira.
GC e Tingalaraga agradecenlle a súa valentía por dar a cara e explicar un asunto, o da prostitución, criminalizado mediatica e socialmente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.