Galicia terá dúas eurodeputadas nacionalistas por primeira vez no Parlamento Europeo
Ana Miranda incorporarase ao seu escano en Bruxelas o 28 de febreiro tras o pacto acadado na coalición Os Pobos Deciden. Únese a Lidia Senra, que acadou escano dentro da coalición galega AGE-Europa.
Por Galicia Confidencial | Bruxelas | 21/01/2018 | Actualizada ás 11:39
Ana Miranda sumarase a Lidia Senra no Parlamento Galego. Será a primeira vez que o Parlamento europeo teña dúas eurodeputadas nacionalistas galegas. Miranda tomará posesión do seu escano como eurodeputada o vindeiro 28 de febreiro e ata fin de lexislatura en maio de 2019, collendo o revelo de Josu Juaristi dentro da coalición Os Pobos Deciden, coa que o BNG concurriu aos pasados comicios a Eurocámara con Euskal Herria Bildu (EH Bildu) e outras formacións minoritarias de esquerda nacionalista, como a aragonesa Puyalón de Cuchas, a asturiana Andecha Astur, ou as formacións canarias Alternativa Nacionalista Canaria (ANC) e Unidad del Pueblo (UP).
Será pouco máis dun ano de actividade parlamentaria na que coincidirá con Lidia Senra, militante nacionalista elixida nunha coalición galega de partidos, AGE-Europa, e que leva en Bruxelas desde o 2014.
Como eurodeputada, Ana Miranda ocupara os seu escano dentro do Grupo Verdes-Alianza Libre Europea/ALE, tendo en conta que o Bloque forma parte desde 2004 deste espazo e dando continuidade a traxectoria de traballo que o BNG leva desenvolvendo dentro deste Grupo parlamentario da Eurocámara.
Pola súa banda, Lidia Senra forma parte da Esquerda Unitaria Europea-Esquerda Verde Nórdica no que están integrados Anova, IU, Podemos e Bildu, que decidu incluírse neste grupo e non no de ALE. Desde hai un ano, Senra está como eurodeputada nacionalista --forma parte de Anova-- non adscrita ao decidir marchar de AGE-Europa polas presións exercidas por Izquierda Unida. Desde que está na Eurocámara, Senra impulsou iniciativas a prol da pesca, da agricultura, dos sectores estratéxicos de Galicia, do benestar social, do patrimonio ou en contra da eucaliptización de Galicia.
Miranda
Ana Miranda volve á Eurocámara logo de anos de ausencia. Alí tiña desenvolvido un intenso traballo político, sobre todo, en asuntos relacionados coa pesca ou o agro. Tamén levou a Bruxelas o sinistro do Alvia e iniciativas en relación a vaga de lumes ou denunciando, o espolio do patrimonio do pobo galego por parte dos herdeiros do franquismo, ou a exclusión de Galicia de infraestruturas básicas como o corredor atlántico de mercadorías, entre outros asuntos.
Segundo apunta o BNG nun comunicado, a toma oficial do escano "permitirá reforzar a capacidade de actuación política do Bloque para sacar adiante as cuestións que afectan ao país, en particular as vinculadas aos sectores produtivos estratéxicos como pesca ou agricultura, medioambiente, o saneamento integral das rías ou a ampliación da Rede natura en Galiza".
