As “excursións con callos” do PP para falar de violencia de xénero chegan ao Parlamento

A parlamentaria do BNG por Lugo, Olalla Rodil, presentará unha iniciativa no Parlamento Galego para que se aclare cal é a implicación da Xunta de Galicia na promoción do acto da Federación Veciñal Lucense que tivo lugar no edificio administrativa da Xunta en Lugo o pasado 20 de xaneiro e no que participaron altos cargos do goberno galego. Unha iniciativa que, supostamente era para combater a violencia machista pero que acaba en cocido e visita a un centro comercial.

“Desde o BNG pediremos ao Goberno galego no Parlamento que explique como poden rematar fondos públicos e campañas institucionais destinadas a previr e combater a violencia machista convertidas en anuncios publicitarios para visitar centros comerciais e xantar callos” dixo Rodil. “No BNG queremos saber cantos cartos se destinaron a financiar esta actividade, que parte do 'pack' corre a conta do Goberno e se a Xunta obriga a veciñanza das localidades e comarcas a se desprazar até a cidade de Lugo para visionar un filme sobre violencia machista en vez de aproximar os materiais e as campañas que promove á poboación”, engadiu.

Así mesmo, o BNG preguntará pola opinión que lle merece á Xunta que as súas políticas rematen promovendo excursións e se este é o obxectivo da campaña de prevención da violencia machista no ámbito veciñal “que anuncian a bombo e prato”. Desde o BNG lembran que a violencia machista é un dos maiores problemas políticos de día de hoxe. "Non se pode trivializar a violencia machista nin promover excursións veciñais para visitar centros comerciais con ela", concluíu.