Aena exclúe o galego no teléfono de información do aeroporto de Compostela
Un usuario denuncia a negativa do operador aeroportuario a prestarlle o servizo en lingua galega. Gravación no interior.
Por Galicia Confidencial | SANTIAGO DE COMPOSTELA | 03/02/2018 | Actualizada ás 09:58
A Mesa pola Nornalización Lingüística vén de recoller queixas pola exclusión da lingua galega nos servizos de atención e información aeroportuaria de Aena. O último caso rexistrado é o dun cidadán galegofalante que chamou ao servizo de atención telefónica do operador aeroporturario para solicitar información sobre as tarifas do aparcadoiro do aeroporto de Santiago de Compostela. O usuario denunciou a negativa de Aena a prestar o servizo en galego.
"A primeira discriminación sufriuna ao non poder escoller galego no menú de idioma —só permite castelán ou inglés—. Unha vez puido ser atendido por un teleoperador, pediu amabelmente ser atendido na súa lingua. Esta petición motivou unha reacción belixerante e díxoselle que «sólo español o inglés, no se habla gallego en este departamento»", describe a Mesa.
Actualmente a empresa pública Aena dispón dun servizo telefónico de información e atención á clientela que só permite atención en castelán ou inglés, o que contravén o Estatuto de autonomía que establece no artigo 3 que “os poderes públicos de Galicia adoptarán as medidas oportunas para que ninguén sexa discriminado por razón de lingua”, lembra a Mesa. Do mesmo xeito, recorda, "as discriminacións por razón de lingua son contrarias ao artigo 14 da Constitución".
"Cómpre lembrar que a obriga de respectar os dereitos lingüísticos da cidadanía galega non incumbe só ás administracións públicas, tamén as empresas privadas que prestan os seus servizos en Galicia deben respectar o dereito dos galegos e galegas a nos expresar na nosa lingua dentro do noso territorio, como recoñecen entre outras, a Lei 1/2010, relativa aos servizos no mercado interior (disposición adicional sexta) e a Lei 2/2012, do 28 de marzo, galega de protección xeral das persoas consumidoras e usuarias no seu artigo 46", detalla a Mesa.
Esta organización tamén lamenta que algunhas empresas traten as persoas galegofalantes como unha “clientela de segunda” ao "ofrecerlle un servizo de peor calidade polo feito de falar na súa lingua, que é a propia e oficial do territorio no que vive".
“Estamos ante unha vulneración dos dereitos do consumidor que non pode ser tolerada” explicou o presidente da Mesa Marcos Maceira.
Por todo isto, solicitarán a Aena que incorpore de xeito inmediato a atención en galego.
