Galicia lanza con varias rexións europeas a primeira ruta de mergullo para descubrir patrimonio subacuático

A directora de Turismo de Galicia, Nava Castro, presentou a que se reivindica como "primeira ruta europea de turismo de mergullo sustentable", unha iniciativa conxunta xurdida ao amparo do proxecto europeo 'Wildsea Europe' no que a Comunidade galega participa xunto a Reino Unido, Irlanda e Portugal.

Este "pioneiro itinerario", segundo destaca a Xunta, permitirá conectar lugares de mergullo "de primeiro nivel" establecendo sinerxías cos deportes náuticos, a enogastronomía, o turismo mariñeiro e a arqueoloxía marítima.

"É unha perfecta oportunidade na que Galicia ofrecerá a súa personalidade e singularidade como destino e tamén a experiencia na posta en marcha de produtos vinculados ao mar, que poderán enriquecer este novo itinerario internacional", destacou Nava Castro durante a rolda de prensa no Grove (Pontevedra).

Tamén estiveron presentes varios membros do grupo de traballo que están estes días en Galicia ao ser o lugar escollido para o lanzamento deste proxecto.

'Wildsea Atlantic Ocean Heritage Route (WAOH! Route)', como se denomina, conta co apoio financeiro da Unión Europea, que achega os 375.000 euros do investimento para a súa posta en marcha e nace "para fortalecer a Europa como un destino sustentable de alta calidade que é capaz de crear unha identidade compartida baseada nos hábitats mariños e no amplo patrimonio subacuático do Atlántico".

AVISTAMENTO DE CETÁCEOS E KAIAK

Tomando como fío condutor o turismo de mergullo, o proxecto permitirá, segundo explica a Xunta, combinalo con actividades náuticas que incluirán percorridos en kaiak polas rías galegas.

Tamén se combinará co avistamento de cetáceos ou mesmo actividades para descubrir patrimonio marítimo formado por galeóns, mercantes ou pesqueiros mergullados nas profundidades.