O BNG visualiza o estado de abandono da liña Feve

Responsables nacionalistas partiron das estacións de Ferrol e Ribadeo até chegar a Viveiro para reclamar a Xunta e Estado que aposten por unha infraestrutura "vital" para as comarcas de Ferrolterra, Ortegal e A Mariña.

Por E.P. | SANTIAGO DE COMPOSTELA | 11/03/2018 | Actualizada ás 15:40

Comparte esta noticia

O BNG organizou este domingo unha viaxe en tren Feve para denunciar o estado de abandono que sofre esta liña de pasaxeiros e mercadorías que conecta o norte de Galicia. Así, representantes públicos e afiliados nacionalistas partiron de Ferrol e Ribadeo até Viveiro para reclamar á Xunta e ao Estado que aposte por unha infraestrutura "vital" para tres comarcas —Ferrolterra, Ortegal e A Mariña— nas que viven 200.000 persoas.

BNG viaxa en Feve para denunciar o seu 'abandono'
BNG viaxa en Feve para denunciar o seu 'abandono' | Fonte: Europa Press

Responsables públicos do BNG na comarca de Ferrolterra, ademais de afiliados, partiron na mañá deste domingo, ás 10,45 horas, desde a estación de ferrocarril de Ferrol até Viveiro (Lugo), onde se atoparon con outros integrantes da formación nacionalista que fixeron o propio desde Ribadeo.

Na cidade departamental, o deputado autonómico Xosé Luís Rivas 'Mini' asegurou que a acción busca "chamar a atención e reclamar que se tomen medidas, xa que é un servizo que está a disposición dunha poboación superior aos 200.000 cidadáns e é de xustiza que funcione".

O parlamentario frontista tamén destacou que este acto pretende "visualizar un problema dun servizo que é rendible e necesario", polo que avanzou que o Bloque seguirá "dando a lata ata que se dean conta de que isto é vital para tres comarcas, como son Ferrolterra, Ortegal e A Mariña".

INICATIVAS PARLAMENTARIAS

'Mini' lembrou que se presentaron diversas iniciativas no Parlamento de Galicia para o impulso da liña Feve. "O que pasa é que isto é unha loita no tempo, a xente tense que dar conta que é un problema real e esperemos que tamén o fagan os políticos, que acaben entrando en razón", apostilou.

Pola súa banda, a alcaldesa de Moeche (A Coruña), Beatriz Bascoy (BNG), que exerceu como portavoz do resto de cargos públicos de Ferrolterra, destacou que "coller o tren é coller o futuro", xa que é unha infraestrutura vital para a que as comarcas "funcionen".

Bascoy manifestou que resulta "imposible fixar poboación" en concellos como Cerdido, San Sadurniño ou Moeche "sen transporte público". Por tanto, reclamou á Xunta que "faga algo" respecto diso para tomar "un novo impulso neste camiño".

ENCONTROS

A alcaldesa de Moeche tamén asegurou que as reunións mantidas até o momento entre responsables municipais, da Xunta e de Renfe para tratar de reverter as carencias neste servizo "non deron polo momento o resultado esperado".

"Desde a Xunta, curiosamente dous días antes desta viaxe, chamáronnos para poder reunirnos a próxima semana, sobre o 20 ou 21 de marzo", asegurou Bascoy, que incidiu en que "o servizo está a ser cada vez peor, cunha clara intención de abandono, para forzar á xente a que deixe de utilizalo".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 2 comentarios

2 Arturo

Pensamos que a Alcaldesa de Moeche equivócase, na liña de sempre de buscarlle intencionalidade política a todo. Non é que o servicio do FEVE sexa " cada vez peor" ( está mais ou menos igual que sempre, incluso con automotores novos ) para " forzar" á xente a abandonalo ( se quixeran " forzar" á xente, con pechar a liña xa estaba ). Eso si, a liña do FEVE ( algo que xa quixeran ter outros ) está desaproveitada, cun moi poucos servicios, e cos mesmos apedadeiros que cando se inaugurou, fai setenta anos. Compre arranxar todo eso: moitos mais servicios ( facendo enquisas aos susuarios ) apeadeiros novos e peche dos que non usa ninguén, e mesmo rectificacións de trazado ou electrificación. O que non se pode facer é deixar morrer o FEVE, que, en contra do que pensan algún da un servicio moito mais cómodo que os buses, e relativamente aceptable en tempo entre Viveiro e Ribadeo. Deixalo como está é deixalo morrer pouco a pouco.

1 Arturo

O FEVE non está " abandonado", segue a funcionar, pero é moi mellorable. Primeiro, cambiando apeadeiros onde fai cuarenta anos ninguén sube ou baixa, por outros donde poida haber demanda. Segundo, poñendo moitos mais servicios: non pode ser que haxa catro ( 4) servicios ao día por sentido, entre Ribadeo e Viveiro: debería haber algo parecido a un servicio de cercanías. Terceiro, compriría arranxar o tema da estación de Foz, moi lonxe do pobo. O FEVE ten futuro, i e moito, moitísmo mais cómodo que o bus.