Por Galicia Confidencial | Compostela | 16/03/2018 | Actualizada ás 14:16
O líder dos socialistas galegos, Gonzalo Caballero, considera que o presidente da Xunta e do PPdeG, Alberto Núñez Feijóo, "ten que explicar" quen lle avisou das súas fotos co narco Marcial Dourado.
Nunha entrevista co programa 'Salvados', o presidente da Xunta recoñeceu que "sabía que existían" esas fotografías antes de que as publicara 'El País' no ano 2013. Cando Jordi Évole lle preguntou como se decatou da súa existencia respondeu coa seguinte afirmación: "Creo que foi o delegado do Goberno da época". Posteriormente engadiu que tivo que ser "como en 2004 ou por aí".
Este venres, Caballero foi preguntado pola prensa pola resposta de Feijóo o xoves sobre este tema a xornalistas galegos, entre eles a Galicia Confidencial, aos que lles dixo que "cando teñan un programa en La Sexta igual lles contesto".
"CARREIRA DE PROMOCIÓN" DE FEIJÓO
Respecto diso desta cuestión, o líder dos socialistas galegos apuntou que "na súa carreira de promoción persoal Feijóo acudiu a un programa nacional e atopouse acurralado polas preguntas dun xornalista".
"Deixou cuestións encima da mesa como que recibiron as fotos das mans dun delegado do Goberno, e o que ten que explicar ao país e, desde logo, á prensa que lle pregunta en Galicia, é que pasou con esas fotos e por que as tivo e quen llas deu", avisou Caballero.
De feito, o secretario xeral do PSdeG considera que Feijóo "non está a ser consciente do que está a pasar e do afastamento que existe desde a sociedade cara a un presidente acurralado e sen capacidade de resposta".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.