Lugo acollerá o primeiro gran encontro de cómic histórico de Galicia
Será dentro das actividades do Arde Lucus 2018 e contará coa participación dalgúns dos principais ilustradores de cómic histórico de Galicia. Estará aberto á participación cidadá para aprender a ilustrar romanos ou castrexas.
Por Galicia Confidencial | Lugo | 24/03/2018 | Actualizada ás 10:00
O comic histórico chega ao Arde Lvcvs cunha interesante proposta, a realización do I Encontro de Banda Deseñada Histórica de Galicia. Unha interesante actividade na que participarán algúns dos principais ilustradores históricos de Galicia e que está aberta á participación dos amantes da historia e do cómic.
Galicia é rica en historia, tanto, que pasa por ser o primeiro gran reino de Europa. Por iso, non é de estrañar que haxa lexións de seguidores das distintas temáticas desta historia, desde o Paleolítico, ata a Galicia contemporánea. E tampouco estraña que haxa grandes ilustradores galegos que se adiquen a recrear en debuxos esa rica historia.
Precisamente, algúns deles; Víctor Boullón, Tokio, Miguel Fernández, Tomás Guerrero, Pepe Carreiro ou Manel Cráneo participarán no I Encontro de Banda Deseñada HIstórica de Galicia. Esta innovadora proposta, impulsada polo Concello de Lugo e na que colabora o portal www.historiadegalicia.gal e Demo Editorial, toma forma por primeira vez en Galicia no Arde Lucus e estará dividida en dúas partes; unha máis didáctica e educativa e outra práctica, que terán lugar en abril e xuño deste ano.
Así, a primeira parte do I Encontro de Banda Deseñada Histórica de Galicia terá lugar desde o 6 de abril ao 21, constará de tres sesións teóricas e dous obradoiros prácticos. Nos primeiros participarán os ilustradores Manel Cráneo, Pepe Carreiro e José Barreiro que falarán da banda deseñada histórica en Galicia, especialmente, da época romana e castrexa.
ROMANOS E CASTREXAS
Manel Cráneo abordará o venres 6 de abril o Proceso técnico e creativo da banda deseñada histórica. Pepe Carreiro, o creador dos Bolecha, abordará o día 13 de abril o mundo dos Barbanzáns e a Cultura castrexa en banda deseñada e José Barreiro, o venres 10, Roma na banda deseñada. Todas as charlas comezarán ás 20.00 horas no Museo Interactivo da Historia de Lugo (MIHL).
Pola súa banda, os obradoiros prácticos terán lugar o sábado 14 e o sábado 21 tamén no MIHL, pero en horario de 11.00 a 13.00 horas. O primeiro para nenos e o segundo para adultos. Nestas sesións, os ilustradores Victor Boullón e o lucense Miguel Fernández ensinaránlle aos participantes a debuxar romanos e romanas e castrexas e castrexos. As persoas interesadas en participar xa se poden inscribir a través do 010 ou no 982297350 para as de fóra de Lugo. Trátase de aproveitar a presenza dos ilustradores para ilustrar certas temáticas da vida galaico-romana da época.
Algunhas das ilustracións resultantes destes obradoiros poderían aparecer publicadas na web oficial do Arde Lucus e serán distribuídas a través das redes sociais deste I Encontro de Banda Deseñada Histórica de Galicia.
ILUSTRADORES EN VIVO
Xa en xuño terá lugar a segunda parte deste ciclo de banda deseñada. Os seis ilustradores especializados en xénero histórico percorrerán o sábado 16 de xuño os puntos fundamentais do Arde Lvcvs e realizarán debuxos en directo situados en puntos estratéxicos da cidade e da festa. O obxectivo é tentar representar en banda deseñada o ambiente que tería a antiga Lucus Augusti a través da representación historiada que veciños e asociacións fan durante esta festa.
