A Fiscalía ve "indicios de delito" na morte dunha doente nun corredor do Clínico de Santiago
A denuncia recolle que "tardaron un tempo en atendela". A coalición médica CESM-O'Mega "aplaude" a decisión do Ministerio Público e subliña que "non se aumentaron" os espazos de traballo. Sanidade di que está disposta a colaborar.
Por E.P. | SANTIAGO DE COMPOSTELA | 26/03/2018 | Actualizada ás 14:13
A Fiscalía remitiu a un xulgado de Santiago unha denuncia por considerar que "hai indicios de delito" na morte dunha doente. O suceso acontecera mentres a doente esperaba asistencia nun corredor no servizo de Urxencias do complexo hospitalario compostelán (CHUS) en febreiro de 2017.
Segundo confirmaron fontes da Fiscalía, despois dunha denuncia recibida pola morte dunha doente á que "tardaron un tempo en atender" e faleceu cando a foron a asistir en Urxencias, o Ministerio Fiscal analizou os feitos e falou con testemuñas. Despois disto decidiu formular denuncia nun xulgado. As mesmas fontes indicaron que agora será o xulgado correspondente o que "determinará se houbo neglixencia ou deficiencia na atención" da persona falecida en Urxencias.
Respecto diso, a delegada sindical de CESM-O'Mega Fátima Nercellas, que se encargou de denunciar estes feitos ante a Fiscalía, explicou, en declaracións a Europa Press, que este foi o terceiro falecemento denunciado nuns corredores de Urxencias do CHUS nos últimos anos, polo que "aplauden" a decisión do Ministerio Público.
Fátima Nercellas comentou que morre "un paciente cada ano" de media en corredores de Urxencias do CHUS. Segundo dixo, trátase de "pacientes graves esperando espazo para ser atendidos". "Hai un ano denunciei o terceiro falecemento", lembrou, para matizar que o 31 de xaneiro pechouse a investigación do Ministerio Fiscal e a Fiscalía presentou denuncia no xulgado de garda compostelán correspondente.
MÁIS ESPAZOS
A delegada sindical lembrou que "hai tres anos" convocaron folga "pola falta de espazos para traballar" en Urxencias e para demandar máis persoal. Sobre iso, Nercellas matizou que se incrementou un médico na quenda de noite, pero "os espazos non aumentaron", feito que "foi denunciado nun xulgado do Social".
"Urxencias úsase como almacén de doentes pendente de ingreso", denunciou Nercellas, quen explicou que contan con "69 sitios" para atender, cando teñen de media entre "15 e 30" pacientes pendentes de ingreso acumulados. Do total de espazos, así mesmo, puntualizou que "14 non teñen dotación de persoal e ábrense con reforzo".
DISPOSTA A COLABORAR
Pola súa banda, a Consellería de Sanidade expresou este luns a súa disposición a "colaborar coa máxima transparencia" na investigación. Así o indicaron a Europa Press fontes de Sanidade, que puntualizaron que "a día de hoxe non consta no Sergas ningún tipo de requirimento nin petición" de informe "por parte da Fiscalía" nese sentido.
