Retoman a busca da moza ourensá á que arrastrou o mar o venres santo na Coruña

Os labores de busca da moza ourensá de 22 anos á que arrastrou un golpe de mar a madrugada do venres santo na Coruña retomáronse ás 10,00 horas deste sábado. O director de Seguridade Cidadá do Concello da Coruña, Carlos García Touriñán, informou de que participan 50 efectivos.

Desde terra, o rastrexo realízano efectivos de Protección Civil, mentres que na auga hai bombeiros e dúas embarcacións. A todos eles súmase desde o aire un helicóptero de Salvamento Marítimo.

Aínda que se prevén condicións meteorolóxicas mellores que as deste venres, que dificultaron as tarefas, García Touriñán apuntou que polo momento non son "moito mellores".

A concelleira responsable de seguridade cidadá, Rocío Fraga, sinalou a última hora da tarde do venres que a intención durante esta xornada é, se as condicións do mar o permiten, mergullar en zonas rochosas próximas onde se produciu o incidente, na coraza que separa as praias de Riazor e do Orzán.

A concelleira avanzou que no mediodía deste sábado, coa baixamar, é o momento no que o dispositivo centra as súas maiores esperanzas para dar co corpo da nova.

O pai e a irmá da muller, "esnaquizados" e "en shock", acudiron á Coruña xunto a outros familiares para seguir de preto os labores de buscxa e recibiron atención psicolóxica. O Consistorio coruñés está "en permanente contacto telefónico" con eles.

A moza de 22 anos desprazouse á Coruña de visita durante a noite do xoves e na madrugada do venres, pouco antes das 6,00 horas, ía cun grupo de amigos, xunto aos que se achegou á coraza, segundo apuntou Fraga, de maneira "imprudente" para ver as ondas. Estaba declarada unha alerta de nivel laranxa por fenómenos costeiros en todo o litoral galego.