Temas: PUNTOGAL LIBRO

PuntoGal distribuirá 12.000 marcapáxinas nas librarías e feiras do libro de Galicia

A asociación, en colaboración con Política Lingüística, a Federación de Librarías de Galicia e o IES Leixa, lanza cinco modelos de marcapáxinas para animar á lectura e o ofrece o rexistro dun dominio .gal por só 15 euros.

Por Galicia Confidencial | Santiago de Compostela | 21/04/2018 | Actualizada ás 11:20

Comparte esta noticia

PuntoGal, o dominio galego en Internet, pon en marcha unha campaña especial para celebrar o Día do Libro en colaboración coa Secretaría Xeral de Política Lingüística, a Federación de Librarías de Galicia e o IES de Leixa. Cinco alumnos deste centro educativo deseñaron e asinan cinco orixinais marcadores onde animan a ler. Para axudar neste empeño, cada marcapáxinas inclúe un código que rebaixa o prezo dun dominio .gal a tan só 15 € + IVE. PuntoGal distribuirá arredor de 12.000 destes deseños nas feiras do libro e nas librarías galegas.

Presentación dos cinco marcapáxinas que se distribuirán nas librarías e feiras do libro de Galicia
Presentación dos cinco marcapáxinas que se distribuirán nas librarías e feiras do libro de Galicia | Fonte: Xunta.

A promoción comeza este mesmo 23 de abril e estará activa ata o 31 de agosto. Os códigos poden validarse en calquera das dúas empresas rexistradoras que participan: Dinahosting e CdMon. 

No acto de presentación, celebrado no IES Leixa, o secretario xeral de Política Lingüística, Valentín García, sinalou que “unir o libro e os dominios .gal de Internet é xuntar nun mesmo proxecto dous dos axentes máis importantes da cultura galega e en galego, un de tan longa tradición como prometedor futuro e outro que representa a innovación e a  extensión da nosa lingua aos novos espazos de comunicación xurdidos nas últimas décadas”.

O director xeral de PuntoGal, Darío Janeiro, enmarcou esta iniciativa na aposta da entidade por “involucrarse de maneira decidida en actividades relacionadas coa lingua, a cultura e a tecnoloxía en Galicia, as tres almas do dominio”.

Dese plan forman parte iniciativas como “o recente e moi exitoso concurso de relatos en colaboración coa Real Academia Galega ou a participación en Culturgal”, á que agora se suma “un proxecto no que axudamos a divulgar a creatividade dos estudiantes dun centro público animando a practicar unha das mellores actividades que calquera de nós pode facer: ler un libro”, dixo Janeiro, quen remarcou que o número de dominios rexistrados xa superou os 4.800.

Janeiro tamén fixo fincapé na oferta asociada ós marcapáxinas que “permite ter un dominio .gal a un prezo moi atractivo”.

Finalmente, o director xeral do dominio felicitou ós autores dos marcapáxinas, finalistas e presentados, pola calidade dos traballos, “onde xa se pode apreciar unha combinación prometedora de creatividade e técnicas profesionais”.

Os cinco marcapáxinas seleccionados, que se poderán descargase xunto co resto dos presentados polos estudiantes na web de PuntoGal (asociacion.gal), son da autoría de Julio Santiso Barreiro, Aida Bao Estévez, Tamara Álvarez Castro, Natalia Romero Díaz e Borja Rey Estévez.

Temas: PUNTOGAL LIBRO
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta