Por Galicia Confidencial | Compostela | 25/04/2018 | Actualizada ás 17:12
Os fiscais de Galicia intensifican as sús protestas para reclamar mellores condicións laborais. Unhas reclamacións que se unen as dos funcionarios de xustiza que levan xa case dous meses e medio de folga. Por iso, este xoves realizarán un paro dunha hora en numerosas sedes xudiciais do país e anuncian tamén novos paros dunha hora os días 26 de abril, 3, 10 e 17 de maio. Para o 4 de maio está convocada, ademais, unha xornada de folga.
Os fiscais non só piden o "impulso inmediato" da modificación da Lei Orgánica do Poder Xudicial para a recuperación dos permisos e medidas de conciliación da carreira xudicial e fiscal; senón a retirada desas 50 emendas que "coartan o exercicio da función xudicial e baleiran certas competencias ao órgano de goberno dos xuíces".
Tamén esixen a presentación dun proxecto ou proposición para a reforma desta lei no que respecta ao Consello Xeral do Poder Xudicial para garantir que a elección dos seus vogais sexa directamente polos xuíces e maxistrados e que se asegure "a igualdade de xénero e a representatividade".
Nunha protesta convocada hai unha semana, e na que tamén participaron xuíces, reclamaron ao Ministerio de Xustiza un plan de investimento "suficiente e prolongado" para convocar polo menos 300 prazas co fin de incrementar a planta xudicial e fiscal e poder equiparala á media europea. Tamén, piden a convocatoria "inmediata e formal" da Mesa de Retribucións co obxectivo de recuperar o nivel salarial perdido en 2010 e adecuar a retribución á responsabilidade inherente á función.
Con respecto ao Ministerio Público, interésase que se derrogue o sistema de prazos máximos de instrución mentres non se dote dos medios necesarios ao efecto; o reforzo da independencia da Fiscalía e a súa autonomía orzamentaria, así como que sexa a propia Fiscalía Xeral do Estado quen forme aos seus integrantes.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.