Por Galicia Confidencial | Compostela | 26/04/2018 | Actualizada ás 15:04
A Xunta sae, virtualmente, gañadora do longo conflicto da xustiza despois de máis de dous meses de folga. Utilizando a vella estratexia do "divide e vencerás", conseguiu romper a unidade sindical e enfrontar aos propios traballadores. De feito, o presidente da Xunta, Alberto Núñez Feijóo, felicitouse este xoves polo preacordo ao que chegou o seu goberno con catro dos sindicatos da Xustiza -- SPJ-USO, UGT, CC.OO. e CSIF -- e cargou durante contra os outros tres --Alternativa na Xustiza-CUT, CIG e STAJ-- aos que acusou de traballar con “intereses políticos”. E advertiu: “Que sigan que quedaron retratados”.
Ademais, foi máis alá ao vinculalos directamente con grupos da oposición e de facer “política” con este conflicto. Un argumento que leva utilizando xa desde o comezo da folga. “Hai partidos políticos que están actuando para danar á Xunta e sindicatos que están máis aos seus intereses e aos destes partidos que en axudar aos traballadores”, criticou en clara alusión a En Marea, PSdeG e BNG.
Na rolda de prensa posterior ao Consello da Xunta, Feijóo saudou o preacordo acadado para tentar, dixo, “volver ao sentido común” e centrarse “nos problemas laborais” dos funcionarios de xustiza e non “noutras custións ques teñen que ver máis cos partidos da oposición”.
Con todo, amosouse prudente sobre o acordado e fixo un chamamento aos funcionarios a que apoien este acordo porque “será positivo para eles e para os cidadáns” e porque, insistiu, “van experimentar melloras”. “Seremos leais con todo o que poña nese acordo e non nos imos volver atrás”, destacou.
DIVISIÓN
Con esta postura dos catro sindicatos, que terá que ser sometida á valoración das asembleas dos traballadoras, a folga indefinida desde o pasado 7 de febreiro dá unha volta e rompe a unidade que había ata o de agora. Mesmo á saída da reunión houbo enfrontamentos verbais entre sindicatos. De feito, os tres que non asinaron acusan ao resto de sindicalistas de "negociar por detrás" e de traizoar aos traballadores.
O goberno galego ofrecera 140 euros máis para médicos forenses, 135 para xestores, 127 para tramitadores e 122 para os auxilios. Isto aplicaríase en tres anualidades. Mentres os sindicatos que non aceptaron seguían defendendo 140 euros liñais ao mesm para todos os corpos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.