A Xunta segue coa adxudicación de parques eólicos con tres novos en Bergantiños

A Xunta acaba de aprobar 3 novos proxectos eólicos que se suman aos 21 anunciados esta mesma semana polo conselleiro de Industria. En concreto, trátase dos parques eólicos Bustelo, Monte Toural e Campelo, todos localizados na provincia da Coruña e promovidos por Greenalia. 

Parque eólico de Malpica

O primeiro, situado nos concellos de Coristanco e Carballo, contará con 11 aeroxeradores e unha potencia de 46,2MW. Os outros dous proxectos declarados de interese especial situaranse nos concellos de Santa Comba e Coristanco: o parque eólico Monte Toural disporá de 5 aeroxeradores e unha potencia de 21MW; mentres que o de Campelo terá 11 aeroxeradores e 42MW de potencia. Algún deles estará nunha zona de relevancia paisaxística.

Segundo informou a Consellería de Economía, Emprego e Industria, estes tres proxectos, xunto a súa infraestrutura de evacuación, alcanzan un investimento asociado de 127 millóns de euros e suman 109MW. "O desenvolvemento das tres iniciativas permitirá a creación de case 1100 postos de traballo durante a súa execución e máis de 30 empregos durante o seu funcionamento e o canon eólico xerado será de máis de 3 millóns de euros durante toda a súa explotación", defende a Xunta

NOVA LEI

A declaración de interese especial destes proxectos é unha figura que introduce a Lei de implantación empresarial, unha lei que está sendo moi criticada por colectivos e grupos da oposición, xa que permite a tramitación prioritaria destas actuacións, así como a redución á metade dos prazos necesarios para obter as autorizacións preceptivas para a construción dos parques. 

O obxectivo da Xunta é volver converterr a Galicia nun paraíso para as eólicas e que aquí se executen proxectos de enerxías renovables no marco das poxas do Estado, tendo en conta que deben estar en funcionamento antes do 1 de xaneiro de 2020. Os tres parques sumaranse aos 160 que están en funcionamento na nosa Comunidade con máis de 3300 MW.