Noriega promete "estabilidade laboral" na Escola de Música de Santiago

O alcalde de Santiago, Martiño Noriega, comprometeuse a "garantir a estabilidade laboral" dos traballadores e o mantemento do actual "modelo" da Escola de Música da cidade, respecto dunha polémica que "nalgúns casos" ve "lexítima" e noutros "interesada".

En concreto, sobre as críticas dos grupos da oposición, o rexedor de Compostela Aberta atribuíunas a unha "ansiedade preelectoral", polo que lembrou que o proceso de licitación "non está pechado", aínda que "todo o mundo" o dea por terminado. Ante unha "preocupación lóxica" de profesores, alumnos e pais, Noriega transmitiu unha "mensaxe de tranquilidade" e anunciou que se pon el mesmo á fronte deste asunto, para "garantir a estabilidade laboral e o modelo da escola".

Con todo, a outras "posicións mediáticas", respondeu que falará "con feitos" e dentro do marco legal. "Quero ser respectuoso coa mesa de contratación, que aínda non valorou a oferta", indicou.

Este martes, persoal da Escola de Música mantivo un breve peche no Pazo de Raxoi e esixiu unha solución para a súa situación laboral. Pola súa banda, o sindicato CIG-Ensino denunciou que o cambio de concesionaria podería provocar "24 despedimentos" e os pais temeron a perda da "calidade educativa".

Respecto diso, o primeiro edil da capital galega informou este mércores, a preguntas dos xornalistas en rolda de prensa, que xa se puxo en contacto este martes con traballadores e algúns pais, para facerlles chegar a súa mensaxe. Como aínda "non hai adxudicatario oficial", Martiño Noriega avogou por "tentar conciliar os tempos", xa que non son os mesmos os administrativos que os políticos, segundo razoou.

"RESPECTO ABSOLUTO"

Neste sentido, tamén transmitiu o seu "respecto absoluto e escrupuloso" a "calquera acción" que persiga a estabilidade laboral, reivindicando unha actitude contraria á criminalización das dinámicas sindicais.

Por último, sobre cando poderá resolverse o proceso de licitación, esperou que "non vaia máis aló de dúas semanas", tendo en conta que as mesas de contratación reúnense martes e xoves e o vindeiro xoves día 17 será festivo. "Se puidese ser a semana que vén, mellor, pero terán eles que marcar os tempos", apuntou o alcalde santiagués.

PISTAS DE PÁDEL

Por outra banda, tamén foi preguntado Noriega polas críticas do portavoz do BNG, Rubén Cela, pola situación das pistas de pádel. O rexedor insistiu en que as enmarca nun "contexto preelectoral" e considerou que existe "moita ansiedade e moita deslealdade".

Neste caso, defendeu que "se lle deu estabilidade" a un servizo que "se normalizou" e leva "sen regularizar desde 2012", polo que entende que a "responsabilidade" está "na anterior lexislatura". Neste suposto o goberno non actuou "antes porque se pretendeu dar unha solución global" a un tema que garda relación co Multiusos de Sar.