Por Galicia Confidencial | Vigo | 04/06/2018 | Actualizada ás 19:30
Afundación, a Obra Social de Abanca, presentou esta tarde, xunto ao colectivo de fotógrafos La Diapo Fotografía conformado por Esteban de la Iglesia e Manu Suárez, e en colaboración coa Consellería de Cultura, Educación e Ordenación Universitaria, a mostra «Como me presento? 17 encontros fotográficos para recoñecerse nas persoas con TEA», na Sala de Exposicións I da Sede Afundación de Vigo. O acto de inauguración contou coa presenza dos fotógrafos autores da mostra, Esteban de la Iglesia e Manu Suárez; a comisaria, Monse Cea; o secretario xeral de Cultura, Anxo Lorenzo; e a coordinadora adxunta da Área de Cultura de Afundación, Paloma Vela.
Comisariado por Monse Cea, este proxecto convida á sociedade para cuestionarse a forma en que se constrúe a identidade social das persoas diversas, nunha proposta de coidada linguaxe e estética, para descubrir a arte inclusiva e contribuír no recoñecemento dos seus protagonistas. Poderase visitar ata o vindeiro 30 de xuño de luns a sábado en horario de 17.30 a 20.30 horas.
Este proxecto retrata 17 encontros que tiveron lugar entre personalidades destacadas na sociedade galega, como o actor Luís Tosar, a cantante Sés, o científico Ángel Carracedo ou o cociñeiro Pepe Solla, e persoas invisibilizadas socialmente, representadas neste caso en persoas con TEA (Trastorno do Espectro Autista).
Mediante estas reunións, os fotógrafos Esteban de la Iglesia e Manu Suárez, compoñentes do colectivo La Diapo Fotografía, e a comisaria Monse Cea, convidan a reflexionar sobre a gran fenda existente entre estes dous perfís e a cuestionarse a forma en que se constrúe a identidade social das persoas con capacidades diversas.
Para cumprir o seu obxectivo, recrean a acción de presentación, o acto social que marca o comezo dunha relación entre persoas descoñecidas co fin de coñecerse e recoñecerse no outro, a pesar das súas diferenzas. Mentres isto sucede, de la Iglesia e Suárez retratan coas súas cámaras esta situación, e retrátanse á súa vez mutuamente rexistrando o momento. O propósito final, promover o coñecemento das persoas con TEA a través das imaxes resultantes deste proceso creativo afastados do ámbito terapéutico, familiar ou educativo aos que a imaxe pública destas persoas se asocia habitualmente.
O resultado é unha obra de arte contemporánea que toma a fotografía como eixe conceptual e formal e como vehículo artístico de comunicación e inclusión. Este traballo serve ao desexo de devolver o carácter significativo á fotografía profesional en xeral e ao retrato de persoas en particular. Enmárcase na corrente da arte procesual, polo que nas 28 fotografías e o vídeo que conforman a montaxe verase reflectido o proceso de creación do resultado final: os protagonistas retratándose entre si e os fotógrafos retratando estes encontros, desvelando así os mecanismos de xeración da imaxe. Todo para crear un xogo de retratos cruzados, resultado final do traballo exposto.
A realización deste proxecto foi posible grazas ao apoio de colaboradores como Construcciones Oreco, Grupo Quatrium e Zlick.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.