Pechan un contrato coa finalidade de garantir a modernización tecnolóxica da pesca

Un novo contrato entre a Xunta e a empresa Sivsa permitirá continuar a modernización dos procesos de xestión e información do sector pesqueiro, en virtude do desenvolvemento de novas funcionalidades da Plataforma Tecnolóxica da Pesca (PTP).

Concretamente, o novo contrato está dotado cun importe de máis de 360.000 euros e estará vixente até xuño de 2020 e dá continuidade aos traballos realizados  até agora por Sivsa, en colaboración coa Consellería do Mar e a Axencia para a Modernización Tecnolóxica de Galicia (Amtega) desde 2012, ano en que se accedeu por primeira vez ao servizo.

Esta plataforma ten como obxectivo facilitar as ferramentas de xestión e de recollida de información do sector pesqueiro e ofrece unha serie de servizos aos sectores produtivos e comercializadores para servirlles de apoio á xestión dos recursos pesqueiros. Tamén ten funcións para coñecer a trazabilidade asociada ao seu transporte e comercialización, en concordancia coas esixencias legais existentes.

Desta maneira, o novo contrato garante a continuidade nos traballos de modernización tecnolóxica e a implementación de melloras no ámbito funcional e no alcance de diversas aplicacións e servizos, tal e como explicou a empresa.

NOTAS DE VENDA E XESTIÓN DE DOCUMENTOS

Así, inclúe notas de venda de pesca fresca, pesca conxelada e acuicultura, xestión de documentos telemáticos e a adaptación ao proxecto Trazapes que desenvolve o Ministerio de Agricultura e Pesca, e que busca ter un control total da trazabilidade dos produtos pesqueiros "desde a rede á mesa".

No plano tecnolóxico, a Plataforma Tecnolóxica da Pesca integra distintas funcionalidades baseadas en tecnoloxías ".NET" e outras baseadas na plataforma corporativa da Amtega para o desenvolvemento de aplicacións, cuxos principais compoñentes son o servidor web Apache, servidor aplicacións Xava JBoss, servidor de base de datos SQL Server, JEE, JRE, Maven 3, Spring ou Hibernate, ademais de módulos BI para a análise de permisos de marisqueo a pé.