Pode un candidato dirixir a radio local?
O PP presenta os seus 315 candidatos como alternativa ao susposto malgasto intrínseco nos bipartitos. Un dos últimos alcaldábeis en presentarse é o de Arzúa, xornalista de profesión.
Por Galicia Confidencial | Santiago | 03/04/2011 | Actualizada ás 21:59
Os conservadores presentaron este domingo os seus 315 alcaldábeis cun discurso centrado nas presuntas eivas de ZP e os bipartitos."Non hai máis perda de tempo e de diñeiro que os bipartitos que saen contra as urnas, posto que nos fan perder diñeiro cos seus soldos e contrasoldos; coa súa publicidade e a súa contrapublicidade; cos seus asesores e contraasesores; co seu alcalde e o seu contraalcalde e con divisións, disputas e descoordinacións" di Feijóo na presentación dos seus 315 candidatos.
O cabeza de cartel en Arzúa , confirmado oficialmente esta fin de semana, era tamén director da emisora muncipal até que o alcalde, militante do BNG, o trasladou temporalmente. O nacionalista Xaquín García, cometeu un "delito electoral, prevaricación e mobbing" ao tomar esta decisión, segundo unha querela presentada nos xulgados polo PPdeG este venres.
García apartou a Armando Cascón do cargo temporalmente ao confirmarse a súa candidatura como candidato conservador. O político do BNG cre necesario que a radio municipal manteña a neutralidade en época electoral. García tamén aprobou as vacacións que pediu Cascón ao ser trasladado.
Para o PPdeG, a decisión de alonxar a Cascón dos micros "vulnera os dereitos fundamentales dun traballador e dunha persoa a presentarse libremente ás eleccións polo partido que estime".
Ademais de en Arzúa, o PPdeG fichou para a lista de Lugo a outro coñecido xornalista radiofónico, Arcadio Silvosa, director de informativos da Cadena Ser da cidade das murallas.
