Por E.P. | SANTIAGO DE COMPOSTELA | 10/07/2018 | Actualizada ás 12:06
A diferenza con outros hospitais dispárase até case unha hora en canto á espera media para atender un infarto no Hospital Universitario Lucus Augusti (HULA) de Lugo, segundo os datos do Rexistro Galego de Infartos (Regaliam) que deu a coñecer o secretario xeral dos socialistas da provincia, Álvaro Santos. É por iso que apremarán, vía Parlamento de Galicia, a que a Xunta estenda o servizo a todo o día --agora funciona de oito da mañá a dez da noite--, algo que ven "inescusable".
Santos, que protesta porque os datos do Regaliam "non son públicos na súa totalidade", reparou en que "os poucos que dan demostran que (os lucenses) están a ser maltratados polas decisións do Partido Popular na Xunta".
Así, debullou que hai "155 minutos de tempo desde o aviso dun infarto á atención, cando noutras provincias é de 102 minutos". "É case unha hora de diferenza", clama. A isto sumou que en Lugo prodúcese "o dobre de taxa de mortalidade que noutras provincias cando (os lucenses) sofren un infarto".
"Iso significa que o feito de que hemodinámica non funcione as 24 horas está a ser negativo para a saúde e a vida dos veciños da provincia. Por iso levamos esta iniciativa (ao Parlamento galego) para que este servizo opere todo o día, sen escusas, sen dilatación", urxe.
"INTERESES INEXPLICABLES"
E é que Santos ten claro que isto, que non se estenda o servizo de hemodinámica ás 24 horas, obedece a "intereses inexplicables, que responden unicamente o desprezo de Feijóo e do PP aos veciños de Lugo".
"Non hai ningún interese sanitario que o poida justificar. Ten que ser algún interese escuro e descoñecido, un interese que afecta ao PP, que afecta directamente o presidente da Xunta ou ao conselleiro de Sanidade", afeou finalmente o líder dos socialistas lucenses.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.