Feijóo sobre o recoñecemento da Xunta ás vítimas franquistas: “Gañamos tres veces nas urnas”
O presidente galego evita solidarizarse coas vítimas, os asasinados e as represaliadas provocados polo golpe fascista de Franco no 36.
Por Galicia Confidencial | Compostela | 19/07/2018 | Actualizada ás 21:40
“Este pasado mércores fixéronse 82 anos do golpe de estado de Franco. Cre que desde as institucións, nomeadamente desde a Xunta, se ten reparado o dor e o sufrimento que sufriron as vítimas e represaliadas durante o franquismo?”. Esta é a pregunta que Galicia Confidencial lle fixo este xoves ao presidente galego na rolda de prensa posterior ao Consello da Xunta.
Un asunto, o da represión franquista, que non lle gusta a Feijóo. Por iso foi directamente pola tanxente na súa resposta. De feito, evitou contestar e respondeu facendo gala das tres vitorias consecutivas que ten conseguido como líder do PP en Galicia.
“Somos un goberno democrático. Gañamos tres veces nas urnas e iso acredita que hai un goberno que ten maioría de votos. E non temos porque reivindicar a nosa democracia porque somos produto directo da democracia, a máis clara e nítica de todas as autonomías”, limitouse a responder sen aludir, en ningún momento, ao sufrimento da dictadura fascista.
