Admitida a trámite a denuncia de EU contra a Fundación Franco por presunto delito de odio
A querela engade que a fundación "nega os crimes de lesa humanidade" e que continúa realizando "accións de exaltación" do réxime franquista.
Por E.P. | SANTIAGO DE COMPOSTELA | 19/07/2018 | Actualizada ás 19:23
A Fiscalía de Santiago admitiu a trámite a denuncia de Esquerda Unida contra a Fundación Francisco Franco por un presunto delito de odio por "negación dos crimes de lesa humanidade" cometidos durante a Guerra Civil e o réxime franquista.
Deste xeito, segundo informou a organización política, o Ministerio Público da capital galega observa indicios de delito e, por tanto, remitiu o expediente do caso a Madrid. A organización política recibiu o pasado mércores a notificación da admisión a trámite da demanda por parte da Fiscalía, que traslada o expediente aos seus homólogos da capital española, xa que é alí onde "teñen domicilio e sede" o denunciado e o medio de comunicación onde se realizaron as expresións que EU denuncia.
A denuncia foi presentada no mes de outubro nos xulgados de Santiago pola coordinadora nacional de EU, Eva Solla, e o secretario de Organización do partido, Rubén Pérez. Nun primeiro momento, a querela facía referencia ás declaracións nas que a FNFF negaba os crimes de lesa humanidade cometidos durante os anos da Guerra Civil e a ditadura.
Meses máis tarde, a denuncia foi ampliada. A ela, EU engadiu que a fundación en honra do ditador continuaba realizando "accións de exaltación" do réxime franquista "fomentando, elaborando e distribuíndo material da ditadura coa finalidade de facer apología da mesma", unhas accións que, como apunta o partido, poderían ser constitutivas de ilícito penal.
EVA SOLLA
"Entendemos que tanto a apertura de dilixencias por parte da Fiscalía e a investigación da policía xudicial, así como este traslado de expediente son xa noticias positivas. Desde EU esperamos que se faga xustiza, ábrase unha investigación e condénese á Fundación Franco por estes feitos", declarou a coordinadora nacional de EU, Eva Solla.
A continuación, a tamén deputada de En Marea sinalou que España "é o segundo país do mundo con máis persoas desaparecidas, só superado por Cambodia, e aínda 40 anos despois da transición seguimos sen ter xustiza, dignidade e reparación para as vítimas".
