Os axentes forestais e ambientais tenden a man á Xunta para evitar a folga desde o Día da Patria
Insisten en que a proposta de acordo "empeora" o de 2004 e acusan á Xunta de que non lles preocupa o medio ambiente.
Por E.P. | SANTIAGO DE COMPOSTELA | 23/07/2018 | Actualizada ás 14:10
O colectivo de axentes forestais e ambientais "tende a man ao diálogo" coa Xunta e advirte de que "sempre hai marxe" de desconvocar a folga prevista para reivindicar unha mellora das súas condicións laborais. En todo caso, se chegado este mércores 25 non se produciu un achegamento nas posturas entre os sindicatos UXT e CIG-Administración, estes profesionais están chamados a secundar un paro desde o Día de Galicia até o venres 27.
A folga, de seguir adiante, converterase en indefinida a partir do 1 de agosto, en plena campaña de alto risco de incendios. O xoves 26, de feito, ás 11,00 horas, teñen convocada unha manifestación desde San Lázaro a San Caetano, en Santiago, para visibilizar a súa protesta.
En rolda de prensa este luns, axentes forestais e ambientais criticaron a actitude da Dirección Xeral de Función Pública, coa que negocian, pois "vende" unha subida económica para estes traballadores pero vinculaa á realización de gardas.
Pola súa banda, as organizacións sindicais reclaman que este aumento "se plasme" no complemento específico, e tamén esixen outras cuestións como unha redución horaria, unha segunda actividade "que garanta non estar en primeira liña de lume" aos axentes de máis idade e modificar os coeficientes reductores de cara á xubilación.
"NON LLE PREOCUPA O MEDIO AMBIENTE"
Ademais, acusan á Xunta de que "non lle preocupa para nada" o medio ambiente, pois o acordo proposto está "claramente enfocado á extinción de incendios", deixando desatendidas, ao seu xuízo, labores de vixiancia por exemplo de especies como salmón e lamprea.
Neste sentido, censuran os servizos mínimos "impostos" do 100% para axentes forestais, "abusivos", pero que non chegan ao 20% para os ambientais. Respecto diso, avisan da "falta de seguridade" que implica que a Administración vaia a permitir que axentes patrullen en solitario en tarefas como control do furtivismo.
Por último, de feito, denunciaron un "desmantelamento" deste servizo, cuxas competencias corresponden á comunidade, e que, segundo lamentan, está a verse substituído por Policía Autonómica e Seprona.
CÁMARAS
Por outra banda, mediante un comunicado de prensa, CC.OO. rexeitou tamén este luns a "substitución" da rede de vixilancia fixa dos montes por cámaras. Asegura esta central que "nos últimos anos pechouse de forma progresiva a metade da rede fixa", constituída por torres de vixiancia.
