Máis de 350 pezas para reflexionar sobre o superheroe do século XXI
A sede de Afundación na Coruña acolle unha mostra do valisoletano David Aja e o ourensán David Rubín, dos dos autores de cómic máis recoñecidos na actualidade.
Por Galicia Confidencial | Santiago de Compostela | 31/07/2018 | Actualizada ás 10:08
Os superpoderes e os superheroes nun percorrido de máis de 350 pezas para reflexionar sobre estes conceptos no século XXI. En clave de banda deseñada e da man de David Aja e David Rubín, dous artistas coñecidos e recoñecidos no nacional e no internacional.
A inauguración da exposición ten lugar este martes 31 ás 11:00h, na sede Afundación da Coruña, coa participación do comisario da mostra, Asier Mensuro, e a coordinadora da Sede Afundación da Coruña, Beatriz Aler. "Superpoderes. David Aja e David Rubín" poderase visitar ata o vindeiro 29 de setembro.
A mostra conforma un percorrido por máis de 350 obras que reflexionan sobre o
símbolo do superheroe no século XXI a través destes dous artistas que desenvolven a súa carreira no mercado norteamericano.
Entre outros, neste proxecto expositivo poderase gozar dos traballos máis importantes para a editorial Marvel de Aja, como Inmortal Iron Fist, Haweye, Wolverine, Avengers ou Captain America; ou das obras de Rubín El Héroe, Aurora West, un spin off da popular serie Batling Boy de Paul Pope, ou ilustracións de personaxes como Batman ou Spirit.
