Por E.P. | SANTIAGO DE COMPOSTELA | 07/08/2018 | Actualizada ás 13:31
O Colexio Oficial de Médicos da Provincia de Pontevedra demandou á Consellería de Sanidade que "afronte con urxencia" a reordenación da atención primaria tras a morte dun home sen asistencia médica este sábado no PAC da Estrada (Pontevedra).
Nun comunicado, esta institución lembrou que isto é "unha necesidade xa manifestada" en 2015 por mor dos grupos de traballo constituídos polos órganos colexiados. "Pasado o tempo e por falta de vontade política desde a Administración, non se afrontaron as peticións realizadas", lamentou o Colexio de Médicos de Pontevedra.
Así mesmo, achacou o sucedido no PAC da Estrada aos "recortes" iniciados nos centros de saúde "por mor da xa superada crise económica", así como á "precariedade, a insuficiencia de medios, a mala xestión dos recursos dispoñibles e a falta dunha adecuada planificación" por parte do Sergas.
CRÍTICAS
Por outra banda, a Asociación Galega para a Defensa da Sanidade Pública criticou este martes a "incapacidade" do Servizo Galego de Saúde (Sergas) para asumir "os seus erros" ou para informar "de forma clara e transparente" sobre a morte do home do PAC da Estrada.
Nun comunicado, a plataforma mostrou a súa "indignación" polas "contradicións" dos responsables da sanidade pública, que trataron, ao seu modo de ver, de "trasladar as responsabilidades" do sucedido "aos profesionais" do centro de saúde.
No entanto, a Asociación para a Defensa da Sanidade Pública considera que esta situación "demostra as advertencias" que realizaron "nos últimos anos" sobre as consecuencias "da política de recortes de orzamento e persoal" que leva a cabo, segundo censura, a Xunta.
"As protestas e mobilizacións xeneralizadas por toda Galicia pola ausencia de substitucións de persoal de baixa ou de vacacións, que masifican os centros de saúde ou o peche de consultas e traslados de pediatras, son outras mostras desta situación", engade a plataforma.
E é que, segundo a versión do Sergas, o médico da PAC da Estrada atopabase atendendo a unha emerxencia fora do centro, polo que o falecido, que sufría "unha enfermidade crónica avanzada", foi atendido polo persoal de enfermaría mentres non chegaban os profesionais do PAC, tal e como indicou Sanidade.
Por iso, a Asociación para a Defensa da Sanidade Pública asegura que "se non hai substitutos é pola falta de planificación" da Xunta, pola "súa mala xestión" e "a súa política de recortar e precarizar as condicións de traballo na atención primaria, que fai que os traballadores fuxan fora de Galicia".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.