Por E.P. | SANTIAGO DE COMPOSTELA | 20/08/2018 | Actualizada ás 11:57
As declaracións de dous axentes da Policía Nacional polo dobre crime do Cash Record de Lugo, sen resolverse desde hai 24 anos, retomaranse o próximo mes de setembro. O 30 de abril de 1994, a irmá dunha das vítimas, Isabel López, achaba os cadáveres de Estebán Carballedo, repoñedor, e de Elena, unha caixeira, tiroteados nesta nave almacenista da capital provincial, onde o autor ou autores levaron un botín de 5 millóns das antigas pesetas --uns 30.000 euros--.
O Xulgado de Primeira Instancia Número 1 ampliou e prorrogou a investigación até decembro, tomando declaración hai unhas semanas a un axente da Garda Civil. Unha rolda de declaracións que se reactivarán en setembro, segundo Isabel López, co interrogatorio a dous axentes da Policía Nacional "aos que nomeou" o garda civil ao que se lle tomou manifestación.
SOSPEITAS SOBRE UN HOSTALEIRO
A irmá da caixeira asasinada insistiu este luns que as sospeitas da familia sobre o autor recaen nun hostaleiro que tiña un negocio no centro de Lugo e que agora reside en Burgos. "É o que nós sempre cremos que están a encubrir porque mobilizaba moitas cousas no seu negocio. Poderíano estar a encubrir", repite.
Isabel López, que chegou a protagonizar unha folga de fame para que se rescatase a instrución tras case vinte anos en punto morto, vai máis aló e non descarta que o principal sospeitoso para as dúas familias fose un "confidente" da policía.
É por iso que "non interesa" que compareza, sostén, á vez que describe que "nas declaracións que houbo anteriormente, ao mencionalo a el como que a xente se pon nerviosa". "El debe de saber moitas cousas e teñen medo de que saia todo á luz", deduciu finalmente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.