Rober Bodegas recibe "máis de 400 ameazas de morte" por un vídeo
O humorista de Carballo fixo alusión á comunidade xitana nun vídeo que logo retirou e pediu desculpas "ás persoas que puidesen sentirse ofendidas".
Por E.P. | Santiago | 27/08/2018 | Actualizada ás 15:18
O humorista Rober Bodegas, unha parte do dúo Pantomima Full, pediu á canle Comedy Central que retire un vídeo cun dos seus monólogos no que fala sobre a comunidade xitana, ao recibir "400 ameazas de morte".
Bodegas explicou nun comunicado que, a raíz do vídeo da súa actuación, recibiu ameazas e mesmo houbo "batidas" para "buscar vinganza, ademais dos miles de insultos". No entanto, o cómico sinalou que viu o erro cometido" e por iso pediu desculpas a "todas as persoas que puidesen sentirse ofendidas".
"Entendo e asumo que a provocación forma parte do meu traballo e que por iso as reaccións ao mesmo sempre adoitan polarizarse. Con relación a outras temáticas tratadas no show, que supoñen o 95% do mesmo e nada teñen que ver con este asunto, tamén houbo reaccións contrarias, aínda que por suposto, non deste xeito", apuntou.
No seu monólogo, Bodegas falaba de que "xa non se poden facer chistes de xitanos" e por iso el decide "facer chistes de paio". "Isto é un paio que vai conducindo, parao a Garda Civil e ten a ITV, o seguro, o coche é seu... Continúe, dille o axente", conta Bodegas nunha das partes do seu monólogo, aínda dispoñible nos vídeos de usuarios de redes sociais.
"A min persoalmente non me ofende ningún chiste, xa ataque á miña procedencia, físico, valores ou crenzas, máis aló de atopalo máis ou menos gracioso ou certeiro, pero comprendo que non todo o mundo afronta o humor da mesma maneira", sinalou o cómico no comunicado, matizando que non porá a disposición das autoridades ningunha das ameazas recibidas "sempre que se dea este asunto por resolto de maneira cordial".
"Na miña opinión, non hai que esperar pedagoxía nin didáctica na comedia cando se dirixe a persoas adultas, pois confío no criterio persoal de cada persoa para discernir entre un chiste e un discurso serio", engadiu. Bodegas explicou que se atopa estes días en zonas rurais de Centroamérica, polo que tivo dificultades para "poder ler todo o recibido e xestionalo".
