O número de peregrinos que usa a 'app' da Xunta para realizar o Camiño de Santiago aumenta máis dun 55%
O Goberno galego indica que suma máis de 30.000 descargas tras tres anos en funcionamento e destaca a súa "utilidade" para planificar as rutas
Por E.P. | SANTIAGO DE COMPOSTELA | 01/09/2018 | Actualizada ás 14:15
O número de peregrinos que utilizan a 'app' --aplicación móbil-- do Camiño de Santiago incrementouse en máis dun 55% no que vai ano, con 9.500 novas descargas até o pasado mes de agosto, o que supón unha "notable evolución" e a "consolidación da súa utilidade".
Nun comunicado, a Xunta, impulsora da ferramenta, asegurou que xa van máis de 30.000 descargas desde a súa creación fai tres anos, e destacou o tempo medio de cada sesión, de 4,45 minutos, que "tamén está á alza" e "acredita o interese dos contidos ofrecidos", con "información en tempo real das distintas rutas".
Entre o dez países que acumulan máis descargas desta 'app' dispoñible en galego, castelán e inglés gratuitamente, segundo sinalou o Goberno galego, atópanse España, Italia, Portugal, Estados Unidos, Reino Unido, Alemaña, Brasil, Francia, Australia e México, con "incrementos xeneralizados na maior parte deles".
Ademais, asegurou que se trata dunha das aplicacións "máis descargadas de Turismo de Galicia", e dunha das iniciativas do plan 'Smart Camiño', desenvolvido en 2016 en colaboración coa Axencia para a Modernización Tecnolóxica de Galicia (Amtega).
Neste senso, a Xunta informou de que, "avanzando nos obxectivos do plan director do Camiño de Santiago, están a desenvolverse numerosas melloras e accións nas distintas rutas", con vista ao Ano Santo 2021, para poder "responder as necesidades actuais da peregrinación, protexendo os valores históricos e favorecendo unha experiencia de calidade".
UTILIDADE DA 'APP'
Os usuarios de 'app' poden consultar información de utilidade como o trazado, a descrición, fotografías e datos sobre os diferentes itinerarios xacobeos, así como sobre os albergues, os recursos turísticos e os distintos eventos previstos nos diferentes concellos galegos.
Así mesmo, permite o acceso ás condicións meteorolóxicas e ás direccións e contactos dos centros de saúde e emerxencias de cada zona. Ademais, tal e como asegurou a Xunta, "a maior parte das súas funcións están dispoñibles sen necesidade de cobertura no móbil".
