Piden dez anos de cárcere por reter aos compañeiros de piso e acoitelar a unha deles

A Fiscalía pide penas que suman 10 anos de prisión para un veciño de Vigo, A.L.M., ao que acusa dun delito de lesións con uso de medio perigoso e outro de detención ilegal, após reter contra a súa vontade aos seus compañeiros de piso, e cravarlle un coitelo a unha deles. O home será xulgado o mércores, na sección quinta da Audiencia Provincial de Pontevedra, con sede en Vigo.

Segundo o escrito de acusación do Ministerio Público, na madrugada do 14 de xuño pasado, este home estableceu unha discusión cos seus compañeiros de piso, aos que ameazou cun coitelo de grandes dimensións, mentres lles advertía de que lles ía a "matar" e a "cortar a iugular".

Nun momento determinado, cravou o coitelo no abdome a unha das súas compañeiras de piso, que caeu sobre unha cama. O acusado, encerrouna a ela e ao outro morador da vivenda nunha habitación, á vez que lles advertía de que tiña as chaves do domicilio e de alí non ía saír "ninguén".

A.L.M. mantivo retidas a estas persoas por espazo de entre 40 minutos e unha hora, ata que chegou a Policía e o detívo, permitindo tamén o traslado en ambulancia da persona ferida. A Fiscalía atribúelle ao acusado un delito de lesións con uso de medio perigoso, e un delito de detención ilegal, en concurso con dous delitos de ameazas. Dáse a circunstancia de que o procesado ten numerosos antecedentes penais e que xa fora condenado por lesións, polo que pide a aplicación da circunstancia agravante de reincidencia.

Así, solicita para el a pena de 5 anos de cárcere polas lesións, ademais da prohibición de achegarse á vítima durante 9 anos; e outros 5 anos de prisión pola detención ilegal, e prohibición de achegarse aos afectados durante 10 anos. Así mesmo, establece unha indemnización de algo máis de 700 euros para a muller á que acoitelou.