Viveiro rexistra ventos por enriba dos 130 quilómetros por hora
A estación meteorolóxica de Penedo do Galo, en Viveiro (Lugo), rexistrou na mañá deste sábado refachos de vento que alcanzaron os 132,9 quilómetros por hora, o maior valor en toda a Comunidade, segundo recolle Meteogalicia na súa páxina web.
Por E.P. | SANTIAGO DE COMPOSTELA | 13/10/2018 | Actualizada ás 14:20
De igual modo, superaron os 100 quilómetros por hora as estacións de Burela (Lugo) --por enriba dos 112--; de Punta Candieira, en Cedeira (A Coruña) --máis de 107--; A Gándara, en Vimianzo (A Coruña) --106,9 quilómetros por hora--; e Punta Langosteira, en Arteixo (A Coruña) --por enriba dos 104--.
En canto ao mar, segundo información de Portos do Estado, a boia das Illas Sisargas rexistrou, ao redor das 11,00 horas, ondas por de até sete metros de altura. Xa na costa, o valor máximo foi de tres metros, en Punta Langosteira.
No entanto, Meteogalicia mantén en alerta amarela case toda a costa galega, onde persisten os efectos da profunda borrasca atlántica con ventos fortes do sur. Así mesmo, advirte que as choivas serán "intensas" nas últimas horas do sábado na metade oeste da Comunidade.
