Acordo unánime na Cámara para evitar que colexios con uniforme obriguen ás nenas a usar saia

Todos os grupos do Parlamento de Galicia chegaron a un acordo para que, a partir do próximo curso escolar, a Xunta implante "todas as medidas pertinentes" para evitar que os colexios con uniforme obriguen ás nenas a usar saia de forma que esta sexa unha opción que as propias alumnas elixan.

As catro forzas da Cámara galega sumáronse a unha iniciativa proposta por En Marea, que pedía instar á Xunta a impedir que os colexios que contemplan o uniforme contemplen esta peza como unha obrigación para as nenas e que estas poidan decidir con "liberdade" se a usan ou optan polo pantalón para acudir ao centro escolar.

"A eliminación de obstáculos para alcanzar a igualdade tamén pasa pola eliminación da vestimenta diferenciada nos centros escolares", manifestou a deputada Luca Chao durante a defensa da iniciativa o martes, xornada na que asegurou que o uso da saia pode condicionar a "liberdade de movemento" das nenas.

Neste sentido, aínda que recoñeceu que a mellor opción sería un "uniforme único", pediu que a Xunta impida que os colexios poidan incluír un código de vestimenta diferenciado por razón de sexo. "Estamos a ensinar ás nosas fillas nos colexios a ser guapas antes que felices, queremos nenas felices que xoguen nos patios, que sexan libres e donas de si mesmas", expresou.

APOIO DE SOCIALISTAS E NACIONALISTAS

Á proposta de En Marea avanzaran xa o martes o seu apoio tanto o BNG como o PSdeG. Así, en primeiro lugar, a deputada nacionalista Olalla Rodil mostrou o seu respaldo a esta petición e considerou, ademais, que o primeiro para "promover a igualdade real e efectiva" na educación é "acabar co financiamento público dos centros que segregan ao alumnado por sexo".

Pola súa banda, o socialista Luís Álvarez advertiu que este non é un debate sobre o uso do uniforme senón sobre unha obrigación que impide que as alumnas "poidan elixir libremente" que peza usan. E, ademais, censurou que o Goberno galego pretendese eludir as súas responsabilidades nesta materia a pesar de "ter todas as competencias" ao pedirlle ao Executivo central que sexa o que lexisle sobre a materia.

POSTURA DO PPDEG

Estas afirmacións do socialista tiñan lugar xusto despois de que o deputado do PP César Fernández Gil defendese unha emenda da bancada popular que pedía trasladar ao Executivo central a necesidade de regular en materia de vestimenta nos centros escolares.

Ademais, a emenda dos populares propuña instar á Xunta a lembrar aos centros escolares a necesidade de incluír normas de vestimenta que non discriminen por razón de sexo e lembraba que son os consellos escolares os que deben aprobalas.

Con todo, na sesión deste mércores, na que se votaron as proposicións non de lei debatidas no pleno, o PPdeG permitiu, coa súa maioría, que esta iniciativa saíse adiante a pesar de que En Marea non aceptou a súa emenda.

Este acordo foi alcanzado nun pleno no que o debates sobre a violencia de xénero e a necesidade de alcanzar unha maior igualdade marcaron a orde do día ante a celebración, o vindeiro domingo, do Día Internacional contra a Violencia Machista.