Por E.P. | Lugo | 08/12/2018 | Actualizada ás 11:58
Os feitos remóntanse a marzo de 2011 e ocorreron no partido xudicial de Monforte de Lemos. Segundo o escrito de acusación pública, a menor, que estaba embarazada de cinco meses, estaba na casa do acusado porque acudira alí en compañía do seu noivo, que ía axudar ao fillo do procesado a cortar leña.
A moza e o acusado quedaron a soas na casa e este ofreceu á menor levala en coche ao lugar onde o seu fillo e o noivo dela estaban a cortar a leña. A menor accedeu pero o acusado, en lugar de levala até alí, dirixiu o seu coche a un camiño apartado, nunha zona cuberta por árbores. Alí sacou a carteira e ofreceu á moza 50 euros por manter relacións sexuais con el e, aínda que a moza se negou, o acusado comezou a tocarlle o peito e a bicala, mentres ela lle pedía que parase.
A menor logrou saír do coche correndo, pero o acusado foi detrás dela ata que conseguiu arrastrala de novo ao coche, chegando mesmo a romperlle a camiseta. Finalmente, após ameazar á moza con que ela e o seu noivo terían problemas se contaba algo, accedeu a levala onde os outros dous mozos estaban a cortar a leña.
A menor, que acabou cunha contusión no abdome, tivo un aborto unha semana despois destes feitos, aínda que a Fiscalía sostén que non se pode determinar que fóra por esa causa. En todo caso, o ministerio público considera ao acusado autor dun delito de agresión sexual e pide para el sete anos de cárcere, ademais do pago dunha indemnización de 30 euros á vítima e de 340,46 euros ao Sergas. Tamén reclama que se lle impoña unha medida de afastamento da moza por nove anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.