Por Europa Press / Redacción | VIGO | 20/12/2018 | Actualizada ás 20:37
O Tribunal Superior de Xustiza de Galicia (TSXG) ratificou "integramente" unha sentenza que desestima o recurso interposto polo hospital privado Povisa de Vigo contra a resolución do Sergas sobre as probas que realiza o ente público a pacientes asignados á empresa en aplicación do concerto, polo que o centro privado atende actualmente a 136.000 persoas desta área sanitaria.
A sección segunda da Sala do Contencioso-administrativo do TSXG confirmou este xoves a sentenza de primeira instancia que desestima o recurso interposto por Povisa contra a resolución do Sergas de febreiro de 2016 sobre determinadas cláusulas do concerto subscrito entre ambas as entidades en setembro de 2014 para a prestación de servizos de asistencia sanitaria especializada.
O TSXG indica na súa resolución que "non hai feitos controvertidos, senón unha discrepancia xurídica sobre a interpretación do alcance do concerto".
Esta sentenza fíxose pública 24 horas despois de que se coñecera a existencia dun acordo entre Povisa e o Sergas que renegocia os termos da súa relación para evitar que o centro privado entrase en situación de concurso de acredores.
O tribunal sostén que se Povisa considera que os conceptos polos que factura o Sergas están "excluídos do ámbito das súas obrigas", é ao hospital a quen lle corresponde "a carga alegatoria de argumentar o por que".
O "obxecto de controversia", segundo recolle a sentenza, xira ao redor de determinados servizos, que o Sergas facilita directamente nos seus hospitais á poboación asignada a Povisa, "concretados en determinadas prestacións, que Povisa entende que non se obrigou a efectuar".
A resolución enumera que estas "técnicas, tecnoloxías e procedementos" son o "PET-TAC, Radiocirurxía Estereotáxica, Biopsia Mama por Vacio (BAV), Cirurxía do Parkinson e Epilepsia, Unidade de arritmias, Determinados sarcomas óseos, Neurorradiología Intervencionista, Tratamento endovascular aortoabdominal, Cirurxía de órbita e derivacións extracomunitarias —actividade que non se fai en hospitais do Sergas—". Sobre as que apunta que son "técnicas e/ou procedementos complexos para os cales o Sergas fixa referencia nos seus hospitais públicos".
O relevante, segundo sinala esta sentenza, é que os "servizos controvertidos" que motivan o recurso de Povisa figuran dentro dos procedementos "incluídos no Real Decreto 1030/2006, o cal xustifica que eses procedementos estean comprendidos dentro do ámbito de obrigas asumidas por Povisa".
Por tanto, o ditame sostén que se estes servizos non están dentro da lista de actuacións que ofrece o centro privado "asume contractualmente a obriga de soportar o custo que lle repercuta o Sergas pola prestación asumida por estes servizos".
"Non se acredita ningunha razón específica pola que algún dos conceptos cuxo custo se repercute a Povisa deba ser excluído do ámbito do concerto", subliña o TSXG, á vez que insiste en que "toda a argumentación" de Povisa "decae" desde o momento en que o contido regulador do Prego de Prescricións Técnicas (PPT), discutido pola empresa e do que se pretende desvincular, "aparece recollido literalmente no documento de formalización do concerto" asinado en 2014 por ambas as entidades.
Ante a intención de Povisa de ter en conta documentos anteriores ao concerto asinado co Sergas en 2014, que segue en vigor até 2021 e que acaban de renegociar baixo a ameaza dun concurso de acredores, a sentenza manifesta que as diferenzas "tan profundas" entre o réxime económico do concerto anterior do ano 2000 e o do ano 2014 "inhabilitan o intento de utilizar o primeiro como elemento interpretativo do segundo", como pretendía Povisa na súa apelación.
"O que non é aceptable é asumir que Povisa, cando fixo a súa oferta, crese de boa fe que só tería que asumir o custo polas prestacións da súa lista de servizos, porque as referencias á carteira de servizos de Povisa, contidas na versión inicial do borrador do Prego de Prescricións Técnicas, foron eliminadas no prego aprobado", asevera o TSXG na súa resolución.
Contra esta sentenza emitida polo TSXG cabe interpor recurso de casación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.