Por E.P. | SANTIAGO DE COMPOSTELA | 01/01/2019 | Actualizada ás 19:04
A área de Turismo e Patrimonio da Deputación da Coruña comezou o 2019 destacando os "importantes pasos dados no deseño dos parques que compoñen o Plan de Patrimonio". Segundo destacaron nun comunicado, os catro proxectos --o Xeoparque de Ortegal en Ferrolterra, o Parque do Megalitismo na Costa da Morte, Compostela Rupestre en Santiago e o Parque da Idade do Ferro nas rías de Arousa Norte e Muros e Noia-- "camiñan cara á consolidación como recursos turísticos de especial interese".
En 2018 "déronse importantes pasos", xa que se constituíron os órganos de dirección de cada un dos proxectos "que decidirán os pasos a dar de face ao futuro". Estes órganos tamén decidirán sobre o investimento dos orzamentos. Neste sentido, a deputación recordou a súa achega de 500.000 euros a cada un dos proxectos.
"PROMOCIÓN DA RIQUEZA PATRIMONIAL DO TERRITORIO"
O deputado de Plans, Patrimonio e Turismo, Xosé Regueira, recordou que "os catro proxectos supoñen importantes fórmulas de xestión dos recursos e promoción da riqueza patrimonial do territorio".
No caso do Xeoparque de Ortegal, que ten no punto de mira conseguir o recoñecemento da Unesco como xeoparque, en 2018 constituíuse o consello de dirección que designou como presidente ao alcalde de Cerdido, Benigno Galego Castro. Están involucrados os concellos de Cariño, Cedeira, Cerdido, Moeche, Ortigueira, San Sadurniño e Valdoviño.
Pola súa banda, no Parque do Megalitismo participan os concellos de Laracha, Cabana de Bergantiños, Carballo, Dumbría, Laxe, Malpica de Bergantiños, Mazaricos, Ponteceso, Vimianzo e Zas. O comité de dirección está presidido polo alcalde de Dumbría, José Manuel Pequeño Castro. Trátase dun espazo con máis de 300 dólmenes e construcións funerarias.
En canto a Compostela Rupestre, na contorna do Val de Maía e do Ulla, constituíuse a comunidade intermunicipal cos concellos de Val do Ubra, Santiago, Ames, Brión, Teo, Vedra e Boqueixón. Para rematar, o Parque da Idade do Ferro conta coa participación de Boiro, Pobra do Caramiñal, Rianxo, Ribeira, e coa colaboración de Porto do Son.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.