Denunciada unha veciña de Silleda por ter seis cans en "lamentables condicións" e outro morto nunha talla
Os animais habitaban nun espazo rodeado dos seus propios excrementos.
Por Europa Press / Redacción | PONTEVEDRA | 10/01/2019 | Actualizada ás 16:33
A patrulla do Seprona da Garda Civil de Lalín (Pontevedra) denunciou a unha veciña da localidade pontevedresa de Silleda por infrinxir a nova Lei 4/2917 de protección e benestar animal ao ter seis cans en "lamentables condicións hixiénico sanitarias" e outro morto nunha talla.
Segundo informou o Instituto Armado, os axentes do Seprona puideron comprobar que esta veciña tiña seis cans de distintas razas "nunhas lamentables condicións hixiénico sanitarias, con evidentes signos de desnutrición debido á esaxerada delgadez que presentaban".
No transcurso da inspección que se realizou nun local anexo á vivenda, o Seprona puido comprobar que os animais habitaban nun espazo rodeado dos seus propios excrementos no que, ademais, atoparon o cadáver dun can no interior dunha talla de plástico.
A propietaria dos cans alegou que os cans os recolleu abandonados na rúa e que non lle podía proporcionar os coidados necesarios aos animais debido ás súas prolongadas ausencias do domicilio, puntualizaron as mesmas fontes.
Por mor das circunstancias observadas e "do mal estado no que se atopaban os animais", o Seprona denunciou á propietaria ante a Delegación Provincial da Consellería de Medio Ambiente da Xunta de Galicia, por unha suposta infracción á Lei 4/2017, de protección e benestar dos animais compañia en Galicia.
Os cans foron recollidos polo Centro de Acollida e Protección de Animais (CAAN) da Deputación Provincial de Pontevedra.
DELITO
A Garda Civil recorda que o artigo 337 do Código Penal, sobre malos tratos animais, contempla que pode ser constitutivo de delito os malos tratos dun animal ao que se lle cause a morte ou lesións graves; os malos tratos crueis, independentemente de que haxa ou non morte ou lesións do animal; a explotación sexual dos animais ou o seu abandono.
Ademais da pena de prisión, os maltratadores poderán ser inhabilitados, non só para traballar con animais, senón para a súa tenencia con carácter xeral.
